E reja që shihni në foto është 21-vjeçarja shqiptare Elisa Doka, e cila u përplas për vdekje nga një automjet, teksa po priste në stacionin e autobusit në Patrida të Verias në Greqi.
Ajo po priste në stacionin e autobusit bashkë me një 68-vjeçare (në foto lart) ku të dyja ndërruan jetë pas përplasjes. Aksidenti tragjik u regjistrua rreth orës 09:40 të mëngjesit të kësaj të hëne, kur një makinë, e drejtuar nga një 64-vjeçar banues në Naousa, e cila ishte nisur nga Veria për në Naoussa, në lartësinë e stadiumit, ka kaluar në drejtim të kundërt dhe ka rënë në strehën e një stacioni autobusi, duke përplasur Dokën dhe 68-vjeçaren.
Dëshmitë e banorëve të zonës për ngjarjen tragjike janë tronditëse.
“Ne zbritëm dhe pamë se çfarë ndodhi. Kishte një zhurmë të madhe. Ishte si tërmet! Nuk ka fjalë, çfarë të them. Humbëm një nga fqinjët tanë më të rinj. Pashë makinën në oborrin tim dhe gruaja u hodh 25 metra. Nuk e pashë fare vajzën. Të dy prisnin të shkonin në Veria. Shoferi tha se kishte marramendje”, tha një banor, duke përshkruar pamjet tronditëse që ka parë.
Në vendngjarje kanë qenë miqtë dhe kolegët e 21-vjeçares, të cilët dukshëm të tronditur nga ngjarja kanë thënë: “Vajza po priste këtu në stacionin e autobusit për të shkuar në spital për të parë tezen e saj. Ajo ishte duke studiuar për infermieri”.
Shoferi 64-vjeçar, i cili ka shkaktuar aksidentin është arrestuar, por me urdhër verbal të prokurorit është lënë i lirë, ndërsa po trajtohet me plagë të lehta në spitalin e Verias.
Discussion about this post