Kryeministri Edi Rama duket se është pajtuar me Ramush Haradinajn, kryetar i AAK-së . Rama dhe Haradinaj u përfshinë muaj më parë në një seri akuzash mes tyre, madje Kryeministri është shprehur se do të padiste për shpifje politikanin e Kosovës, i cili ka ushtruar edhe detyrën e Kryeministrit.
Kryeministri Rama ditën e sotme ka postuar disa fotografi në rrjetin e tij social Facebook, ku në to duket se ka zhvilluar një takim me Haradinajn, ku të dy politikanët shfaqen miqësorë dhe gjithashtu duket se i kanë hedhur pas krahëve përplasjet, akuzat dhe paditë në gjykata për shpifje.
Konflikti mes tyre ka ardhur pasi, Edi Rama pretendonte se Haradinaj ka shpifur ndaj tij për deklaratat që kishin lidhje me temën e shkëmbimit të territoreve. Në këtë padi përmendeshin disa emisione të transmetuara në të cilat Haradinaj ka folur për këtë temë dhe e ka akuzuar Edi Ramën, që së bashku me Presidentin e Kosovës Hashim Thaçin dhe Presidentin e Serbisë Aleksandër Vuçiç, kanë nisur idenë e shkëmbimit të territoreve ndërmjet Kosovës dhe Serbisë.
Nga ana tjetër, Haradinaj shkroi se është në dijeni të raportimeve për padinë e kryeministrit Rama dhe do të përgatis një përgjigje në padi.
“Unë, sipas ligjit, do të përgatis përgjigje në padi, në afatet e përcaktuara ligjore. Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë. Kombi ynë dhe Kosova ka njerëz që i dalin zot në çdo kohë”.
Megjithatë më vonë, Rama ka mbajtur një komunikatë për mediat në Kosovë ku ka deklaruar se do ta tërheqë padinë për shpifje të bërë ndaj Ramush Haradinajt.
“Ramushit i kam kërkuar takim si të gjithëve në selinë e tij apo në shtëpinë e tij. Shpifja ishte mbi mua, mbi Ramushin, mbi të gjithë. Do ta tërheqë padinë. Do ta tërheq padinë jo se është e vogël për mua, por është shumë e madhe ajo që sot na bashkon të gjithë”.
Discussion about this post