Zviceriani Bernard Challandes është shkarkuar nga drejtimi i stolit të Kombëtares së Kosovës. 70-vjeçari u shkarkua nga Federata e Futbollit të Kosovës për shkak të rezultateve zhgënjyese në kualifikueset e Botërorit ‘Katar 2022’, ku e fundit ishte disfata në shtëpi me rezultatin 1-2 ndaj Gjeorgjisë, që është edhe skuadra më e dobët në grupi e dardanëve.
Nga ana tjetër, një nga zërat më të fortë kundër punës së Challandes me Kombëtaren e Kosovës, është komentatorja e mirënjohur kosovare, Qeqa Krelani.
Për një kohë vërtet të gjatë, ajo ka shprehur rezerva mbi punën e trajnerit në shumë emisione sportive të rajonit, dhe më në fund duket se edhe Federata e Futbollit të Kosovës u bind për fjalët e saj.
“Koha po shkon edhe kjo gjeneratë po i kalon vitet e saj. Ne po mundohemi të gjejmë kush është fajtori ose problemi, por problemin ne e kemi brenda në Kombëtare. Defekti numër 1 te ne nuk janë futbollistet, nuk është Federata, por është trajneri. Ai duhet të përshëndetet dhe duhet të hapë krahun për dikë që është më bashkëpunues,”- shprehej javë më parë Qeqa për emisionin ‘Sporti Total’.
Stoli i kësaj kombëtareje tani është i lirë dhe Qeqa nuk ka ngurruar më asnjë moment më shumë për të hedhur propozimin e saj në tavolinë, duke e bërë publik në profilin e saj në ‘Instagram’.
Besnik Hasi është emri i propozuar nga komentatorja, një trajner me një karrierë vërtet të gjatë dhe mund të përmendim drejtimin e stolit të Anderlecht, ku e nisi si asistent dhe më pas trajner i parë, Legia e Varshavës, Olimpiakos dhe për të vijuar më pas në Arabinë Saudite me ekipet Al-Raed dhe Al-Ahli./Gijotina.com
