Fotografuan votën, edhe dy persona arrestohen në Tiranë

Dy persona të tjerë janë arrestuar në Tiranë pasi akuzohen se fotografuan votën.

Policia lokale njoftoi se shërbimet e komisariateve të Policisë Nr. 3 dhe Nr. 4 kanë shoqëruar në ambientet e Policisë, 2 shtetas që sipas njoftimeve të kryetarëve të komisioneve të qendrave ku kishin votuar, kishin fotografuan fletët e tyre të votimit.

“Në vijim të veprimeve procedurale në lidhje me këto raste, është bërë arrestimi në flagrancë i këtyre 2 shtetasve, konkretisht H. D., 57 vjeç dhe R. L., 28 vjeç, për veprën penale ‘Shkelja e fshehtësisë së votimit’. Materialet procedurale do t’i referohen Prokurorisë, për veprime të mëtejshme në lidhje me rastet”, shtuan të njëjtat burime.

Më herët gjatë ditës, blutë njoftuan edhe arrestimin e 56-vjeçare për veprën penale “Shkelja e fshehtësisë së votimit”. “Shërbimet e Policisë në Komisariatin Nr. 1, pas marrjes së njoftimit se një shtetase në shkollën “Ali Demi” kishte fotografuar votën dhe më pas ishte larguar, organizuan punën, identifikuan, shoqëruan dhe arrestuan në flagrancë shtetasen A. H., 56 vjeçe, banuese në Tiranë”, tha policia lidhur me rastin.