Asnjë delegat nga Partia Demokratike e Shqipërisë nuk është ftuar të marrë pjesë në Kongresin e Partisë Popullore Europiane që do të mbahet sot në Roterdam. PD-ja e Shqipërisë është e vetmja parti që nuk kishte asnjë të ftuar.
Dje u publikua dokumenti Partive Popullore Europiane për të gjithë delegatët e ftuar në Roterdam, të cilët do të votonin mes të tjerash dhe për presidentin e ardhshëm të këtij grupimi, si dhe 10 zëvendës presidentët.
PD e Berishës reagoi për këtë lajm dhe e quajti trillim, edhe pse njoftimi për ftesat ishte zyrtar. Mbledhja e delegatëve të PPE, është një eveniment i rëndësishëm për të gjitha partitë e djathta europiane.
Por edhe pse nga Partia Demokratike e Shqipërisë nuk kishte asnjë delegat të ftuar, edhe për shkak të zhvillimeve të fundit në këtë forcë politike, në Roterdam janë shfaqur Jorida Tabaku, Albana Vokshi dhe Belind Këlliçi.
Madje, të tre politikanët shqiptarë të PD kanë ndarë pamje nga Kongresi i PPE-së, vetëm se asnjë prej tyre në të vërtetë nuk është ftuar si delegat apo përfaqësues i PD-së.
Këlliçi ndodhet në këtë kongres si pjesë e forumit rinor EDS, Vokshi si pjesë e forumit të Gruas në PPE (EuroWoman) dhe Jorida Tabaku se është anëtare e grupit parlamentar popullor në Këshillin e Europës.
Pra, tre figurat e PD që ndodhen në Roterdam nuk janë të ftuar si pjesë e forcës politike ku aderojnë, edhe pse në rrjetet sociale thonë se mbështetja për selinë blu do vazhdojë.
Discussion about this post