Fshati Godolesh i cili ndodhet rreth 5 kilometra nga qendra e qytetit të Elbasanit ka problem serioz për sa i përket plehrave, të cilat hidhen nga banorë dhe biznese të zonës. Banoret shprehen se ka vite qe nuk pastrohen dhe kërkojnë të vendosen kontejner për mbeturinat pasi në të gjithë fshatin nuk ka asnjë kontenier ku banorët të hedhin mbeturinat.
Sa i përket mbeturinave urbane ata shprehen se hidhen në anë të rrugës, për shkak se mungojnë kontejnerët dhe as s’kanë shkuar ndonjëherë makinat e pastrimit.
“Mbeturinat ka dy ditë që i hedhin njerëzit. Blej tek dyqanet, dhe duhet caktuar një vend për t’i hedhur. Kërkojmë nga Bashkia të caktojë një vend tamam, të bjerë kazanë që kur të hidhen plehra të vijë t’i marrë plehrat makina e t’i transportojë në landfill” – thotë një banor.
Pirgjet e mbeturinave ndodhen në anë të rrugës kryesore, duke sjellë probleme serioze për shëndetin e banorëve. Kreu i njësisë administrative, Astrit Hazizi, i kontaktuar nga mediat, tha se jemi në dijeni të problemit dhe po merren masa për zgjidhje.
