Kandidati për deputet i Partisë Socialiste në Shkodër, zona e Fushë Arrëzit, Ervin Doda, është kallëzuar penalisht nga Partia Demokratike në Prokurorinë e Tiranës me akuzën e pretenduar se ka fshehur të dhëna në formularin e dekriminalizimit për të shkuarën e tij, më konkretisht 5 muaj burg për veprat penale të dyshuara kanosje dhe armëmbajtje pa leje.
Sipas kallëzimit, Ervin Doda është arrestuar në vitin 2016 dhe ka bërë 5 muaj burg si dyshuar për veprat penale kanosje dhe armëmbajtje pa leje. (Në përfundim Doda është shpallur i pafajshëm).
Doda ka plotësuar formularin e dekriminalizimit në vitin 2023 në cilësinë e anëtarit të Këshillit Bashkiak të Fushë Arrëzit, përfaqësues i PS. Gjithashtu, Ervin Doda ka plotësuar formularin e dekriminalizimit në vitin 2025 si kandidat për deputet në zgjedhjet e 11 majit.
Sipas kallëzimit penal, Ervin Doda, në të dy formularët, duke iu përgjigur pyetjes nr. 4, ka deklaruar se nuk ka qenë ndonjëherë i arrestuar për kryerjen e një vepre penale, ndërkohë që rezulton se ka bërë 5 muaj burg.
Në këto kushte, në materialin kallëzu3s thuhet se kandidati për deputet Ervin Doda ka konsumuar elementet e veprës penale të falsifikimit të vulave, stampave ose formularëve, parashikuar në nenin 190, paragrafi i dytë i Kodit Penal.
Disa ditë më parë, përfaqësues të lartë të PS prezantuan kandidatët për deputetë në Pukë. Kryetari i Bashkisë Shkodër, Benet Beci shkroi; ‘Në Pukë në prezantimin e kandidatëve të PS-së në zgjedhjet e 11 majit për Pukën dhe Fushë Arrëzin. Frrok Gjini dhe Ervin Doda janë emrat që përfaqësojnë denjësisht jo vetëm socialistët, por edhe gjithë banorët e këtyre zonave. Entuziazmi i anëtarëve të PS-së është garancia e një fitoreje dhe e frymës pozitive…’./ Prapaskena
Discussion about this post