Ish-kryeministri Sali Berisha ka ftuar një natë më parë të larguarit nga Partia Demokratike si Arben Imami, Jozefina Topalli, Majlinda Bregu dhe Astrit Patozin, që këta personalitete të rikthehen në parti.
Ndaj kësaj ftese ka reaguar për herë të parë, Astrit Patozi, ish-nënkryetari i PD-së dhe ish kryetari i Grupit të PD-së, tashmë kryetari i Partisë Bindja Demokratike.
Patozi shkruan se nuk ka ndërmend të kthehet në PD dhe se i falenderon që e kujtojnë, por shton se nuk është në kërkim të ndonjë partie, aq më pak të atij lloji, që janë katandisur si mos më keq nga drejtimi i gabuar duke lëshuar kritikë të drejtpërdrejtë për vet Sali Berishën dhe kupolën drejtuese.
Ish-nënkryetari i PD-së, ka thënë se ndjehet rehat me jetën dhe lirinë e tij, ndërkohë që për asnjë moment nuk ka menduar se në politikë bëhet vetëm brenda një partie dhe vetëm rrotull një udhëheqësi legjendar dhe të pagabueshëm duke ironizuar metodat e Sali Berishës.
“Por meqë ftesa verbale për “dasêm” qenka bërë pas mesit të natës, kujtoj se e njëjta gjë ka ndodhur edhe 5 vjet më parë, kur na larguan. Natyrisht, pa votë dhe pa mbledhje forumesh politike.
Të paktën, orën mund ta kishin ndërruar. Se në dorë vetë e kishin, si atëherë edhe tani”, e mbyll përgjigjen Patozi.
Discussion about this post