Këtë të hënë në Kuvend, deputeti i Partisë Demokratike për Lushnjen, Saimir Korreshi ka sjellë shqetësimet e banorëve të zonës së tij. Duke përdor ironinë e tij, demokrati tha se poshtë ka varfëri, por qeveria nuk e shikon. Korreshi, komentoi edhe legalizimin e kanabisit me shumë satirë.
“Nuk e di ku jetojmë. Unë do të them tre problematikat e elektoratit tim. Kishin ca halle ata poshtë dhe një ndër ta ishte hashashi, rrija e çmimeve dhe fukarallëku. Për hashashin nuk kishin dyshime se tani vetëm gjetën mënyra si ta legalizojnë. Por njerëzit një gjë kishin të mirë të paktën të na mpijnë trutë dhe të harrojmë dy të tjerat çmimet dhe fukarallëkun. Ju thoni kemi bërë rritje ekonomike. Rritja e çmimeve te ju është bërë si ajo vallja tre hapa para dy mbrapa. Poshtë ka fukarallëk. Burra që dalin dhe numërojnë pllakat e trotuarëve. Nuk ju del të ulen në kafe, ju keni marrë dinjitetin.
Korreshi gjithashtu tha se hashashi aty ka qenë, në çdo cep të Lushnjës dhe se sipas tij kjo ka qenë arsyeja se pse u mbyllën serat, që të lihen bosh për mbjelljen e hashashit.
“Hashashi aty ka qenë, në çdo cep të Lushnjës pihet hashash. E ngritën plehun, prandaj u mbyllën serat që të liheshin bosh për hashash. Hanë grosh 30 ditë, i ziejnë në kazan ushtrie. Këtu ka arritur fukarallëku. Nuk e di çfarë paketash keni bërë, por të gjithë ata që ju dhanë votën më 6 mars, për atë 30 mijë lekëshin u keni bërë presion. Fukarallëku është ulur në gjunjë këmbë kryq dhe po pret që ju ti hidhni koren e bukës” – tha ai.
Discussion about this post