Furgoni i Ministrisë së Shëndetësisë del nga rruga në Lezhë-Laç, humb jetën shoferi (Emri)

Një aksident fatal ka ndodhur këtë të enjte në aksin rrugor Lezhë-Laç, në afërsi të kryqëzimit të Rrilës.

Furgoni i Ministrisë së Shëndetësisë raportohet se ka dalë nga rruga. Burime bëjnë me dije se për pasojë ka humbur jetën shoferi i mjetit, Ardian Stafa 50-vjeçar. Paraprakisht, dyshohet se shoferi ka pësuar atak kardiak.

Ndërkohë, personat e tjerë që ndodheshin në furgon, të gjithë personel i Ministrisë së Shëndetësisë që po shkonin në Shkodër, janë në gjendje të mirë shëndetësore.

Një hetim ka nisur lidhur me ngjarjen.

“Rreth orës 10:00, në aksin rrugor ‘Lezhë-Milot’, shtetasi A. S., rreth 50 vjeç, teksa drejtonte automjetin, dyshohet se ka pësuar arrest kardiak. Si pasojë, automjeti ka dalë nga rruga dhe 50-vjeçari ka humbur jetën. Grupi hetimor po kryen veprimet për zbardhjen e rrethanave të rastit“, njoftoi policia.