Kombëtarja e Kosovës do ta zhvillojë sonte një ndeshje jashtëzakonisht të rëndësishme.
“Dardanët” do të përballen me rivalin direkt për vendin e dytë në Grupin I të kualifikimeve për “Euro 2024”, Rumaninë, shkruan Gazeta Express.
Ndeshja do të zhvillohet nga ora 20:45, në stadiumin “Fadil Vokrri”.
Kur kanë mbetur edhe më pak se një orë deri te fillimi i ndeshjes, në faqen zyrtare të UEFA-s janë publikuar edhe formacionet zyrtare.
Te formacioni i Kosovës bie në sy mungesa e Mirlind Kryeziut, i cili është i ftuar nga Alain Giresse për këtë ndeshje dhe atë ndaj Bjellorusinë pas tre ditësh.
Nga Federata e Futbollit e Kosovës (FFK) nuk është njoftuar asgjë zyrtarisht rreth kësaj mungese, ndonëse Gazeta Express ka provuar të marr sqarime nga menaxheri i Kombëtares, Bajram Shala, dhe Muharrem Sahiti, drejtori i Kombëtares.
Nga mediat rumune është raportuar se Kosova ka bërë një gafë të madhe me rastin e Kryeziut.
Sipas mediumit të njohur nga Rumania, “gsp.ro”, Kosova e ka hequr gabimisht nga lista qendërmbrojtësin e Zyrihut, duke menduar se ai nuk ka të drejtë loje shkaku i dy kartonëve të verdhë.
Sipas mediumit në fjalë, që i referohet burimeve nga korrespodenti i tyre në Prishtinë, 26-vjeçari do të mund të përfshihej në listë edhe pse ka dy kartonë të verdhë.
“Gsp.ro” shkruan se rregullorja në këtë fazë thotë që një lojtar suspendohet për ndeshjen e ardhshme kur grumbullon tre kartonë të verdhë./Gazeta Express
Discussion about this post