Rilindja Demokratike ka publikuar dy lajme të cilat kanë tërhequr vëmendjen e opinionit publik për shkak se dihet politika editoriale e saj. Lajmi i parë kishte në fokus akuzat ndaj kunatit të kreut të Partisë Demokratike Lulzim Basha. RD shkruante se “Pas projektit 2 miliardë dollarë i trumbetuar fort nga Qeveria dhe kryeministri Edi Rama, për ndërtimin e një porti turistik në Durrës, fshihet kunati i Lulzim Bashës, kreut të PD, Erion Isufi dhe jo një kompani arabe siç thuhej.”
Lajm i publikuar nga “Rilindja Demokratike” mbante pikërisht foton e kunatit të Bashës, Erion Isufi. Lajmi qëndroi një kohë të gjatë në faqe dhe më pas u fshi. Nuk dihet nëse ishte lapsus apo ishte një sulm i qëllimshëm.
Ndërsa një ditë më parë anëtarja e kryesisë së Partisë Demokratike, Jonila Godole tërhoqi vëmendjen e publikut me qëndrimin e saj pro largimit të Sali Berishës nga PD për shkak se tashmë është pjesë e listës së zezë amerikane. Në një intervistë për një mediat, Jonila Godole dha një qëndrim pro amerikan, por duke kërkuar ndarjen përfundimtare të PD nga ish lideri historik i saj.
Por ajo që spikati ishte kur krejt papritur Rilindja Demokratike i dha zë këtij mesazhi duke e publikuar deklaratën Godoles. Organi zyrtar i Partisë Demokratike e mbajti për disa çaste të publikuar lajmin.
Por, në mënyrë të beftë, “bomba” e Godoles u fshi dhe redaksia e RD kërkoi ndjesë lexuesve për shkrimin e publikuar, ndjesë e cila mesa duket ishte edhe për lexuesin Sali Berisha.
Qëndrimet e Godoles shkaktuan jo pak zhurmë në PD pasi në telefonat e të zgjedhurve të ri mbërriti një sms nga kryetari i grupit parlamentar, Alfred Rushaj, i cili u ka dërguar drejtuesve të rinj ku i kërkon që të mos dalin në intervista mediatike, apo të japin qëndrime për çështje të caktuar, pa u koordinuar më parë me linjën politike të partisë.
Të dy këto qëndrime të publikuara nga Rilindja Demokratike më pas u fshinë, por mbetet e paqartë se cili ishte qëllimi, sulmi në shkrimin e parë dhe hakmarrja në të dytin, apo ashtu sikundër pretendohet thjesht një lapsus. A mund të jetë lapsus sulmi i RD ndaj kryetarit aktual të PD dhe ish kryetarit të saj?
