Kreu i Partisë Demokratike, Lulzim Basha dhe kryetari i Bashkisë së Tiranës, Erion Veliaj, do të ruhen nga Garda e Republikës. Vendimi është marrë ditën e sotme në mbledhjen e Këshillit të Ministrave.
Sipas ligjit për Gardën e Republikës së Shqipërisë, neni 12 pika d, i jep mundësi Këshillit të Ministrave që të përcaktoj personalitetet që duhen të mbrohen nga garda.
Një vendim të tillë, Këshilli i Ministrave e mori në qershor të këtij viti dhe që vazhdon akoma, për ambasadorin e Bashkimit Europian Luigi Soreca, pas kërcënimeve që kishte marrë,
Nëse i referohemi këtij raste, mos ndoshta kemi të bëjmë me një kërcënim edhe ndaj kreut të Bashkisë Tiranë dhe kreut të opozitës? Deri më tani nuk është mësuar të ketë pasur ndonjë informacion të tillë, por që arsyeja e vendimit të qeverisë lë vend për të dyshuar.
Vendimi i Qeverisë, reagon PD: Kreu i opozitës ruhet nga Garda e Republikës që nga viti 2007
Partia Demokratike ka reaguar pas lajmeve të shumta që hidhnin dyshime mbi vendimin e Këshillit të Ministrave, i cili ngarkonte Gardën e Republikës që të marrë në rruajtje kreun e opozitës.
Sipas selisë blu, Edi Rama është ai që e ka propaganduar këtë informacion në mënyrë që të shmangë vëmendjen nga situata dhe të bëjë diversione. Më tej PD sqaron se që prej vitit 2007, Garda e Republikës ruan Kryetarin e opozitës, sipas ligjit dhe vendimeve të Këshillit të Ministrave.
“Nëpër disa media Edi Rama ka propaganduar sot se Garda e Republikës do të mbrojë Kryetarin e opozitës. Gjithçka për të hequr vëmendjen nga situata dhe për të bërë diversion. Të paktën që prej 2007, Garda e Republikës ruan Kryetarin e opozitës, sipas ligjit dhe vendimeve të Këshillit të Ministrave. Për pasojë, edhe kryetari i PD, gjatë gjithë kohës, pa asnjë ndërprerje, ka qenë nën ruajtjen e Gardës së Republikës, siç legjislacioni në fuqi ka parashikuar” – thuhet në reagimin e PD.
Por si qëndron e vërteta?
Ligji i ri për Gardën në muajin shkurt të këtij viti, përjashtoi nga mbrojtja e Gardës jo vetëm kryetarin e opozitës dhe kryebashkiakun e Tiranës, por edhe Guvernatorin e Bankës së Shqipërisë, kreun e KQZ-së e shumë personalitete të tjera.
Këta personalitete u kthyen në mbrojtjen e Gardës me vendimin e sotëm të Këshillit të Ministrave, teksa nën mbrojtjen e Gardës shtohen edhe disa personalitete të tjera, siç janë Zef Mazi, Kryenegociatori për zhvillimin e negociatave të anëtarësimit të Republikës së Shqipërisë në Bashkimin Evropian apo Aida Hajnaj, drejtoresha e Byrosë Kombëtare të Hetimit.
