Ibsen Elezi, i vetëm në garë përballë Sali Berishës për postin e kryetarit të Partisë Demokratike hodhi akuza ndaj Komisionit të Rithemelimit për manipulime të kryera në proceset e votimeve brenda partisë.
Në konferencën e mbajtur për mediat paraditen e sotme, ai bëri të ditur se një ditë më parë ka dorëzuar dy kërkesa që kanë të bëjnë me faktet manipulative të kryera nga kryetarja e komisionit elektoral Albana Vokshi bashkë me anëtarin Enno Bozdo.
Sipas tij, personat në fjalë dhe drejtues në Komisionin e Rithemelimit, janë persona të implikuar në këto procese manipulimi.
“Gjithë strukturat drejtuese kanë manipuluar procesin qoftë për zgjedhjen e Lulzim Bashën, edhe Kuvendin e 11 dhjetorit. Opozita e re e Berishës dhe sot Alibeajt kanë harruar aksionin kryesor, luftën ndaj manipulimit të votës. Këta që bërtasin dita ditës kundër Lulit, nuk kanë asnjë dallim me të. Kush e kush duke sharë komunizmin, duke lënë pa fjalë edhe ata që janë dergjur burgjeve.”, u shpreh ai.
Lidhur me kandidimin e tij, deklaroi se lufton për partinë që të presë ferrat, në mënyrë që ai që të vijë pas tij të presë dhe ca ferra të tjera, deri sa të zgjidhet ngërç.
Discussion about this post