Negociatat e ndërmjetësuara nga Egjipti dhe Katari për lirimin e 50 pengjeve me shtetësi të dyfishtë, të mbajtur nga Hamasi në Gaza, kanë dështuar dje.
Këtë e raporton Times Israel, duke cituar një burim diplomatik. Ngërçi ishte me sa duket për shkak të kërkesës së Hamasit për të kushtëzuar lirimin e pengjeve me furnizimin me benzinë për Rripin, por Izraeli e refuzoi kërkesën.
Nga ana tjetër, Kina pranon se Izraeli ka të drejtën e vetëmbrojtjes kundër Hamasit.
Në një bisedë telefonike dje me homologun e tij Eli Cohen, ministri i Jashtëm Wang Yi tha se “çdo vend ka të drejtën e vetëmbrojtjes, por duhet të respektojë ligjin ndërkombëtar humanitar dhe të mbrojë civilët”, në raportin e publikuar mbrëmë nga agjencia shtetërore e lajmeve Xinhua.
Por gjithashtu, Kina “e simpatizon thellësisht gjendjen e palës palestineze, veçanërisht popullin e Gazës” dhe “dënon dhe kundërshton fuqishëm çdo akt që dëmton civilët dhe shkel ligjin ndërkombëtar”.
Në një bisedë telefonike të hënën me homologun e tij palestinez Riyad al-Maliki, ministri i Jashtëm Wang Yi nënvizoi “simpatinë e Kinës për popullin palestinez dhe kërkoi thirrjen e një konference paqeje”, njoftoi agjencia shtetërore e lajmeve Xinhua.
Discussion about this post