Një pyetje nga një gazetar ukrainas ka mjaftuar që ministri i Jashtëm rus, Sergei Lavrov të vihet në vështirësi gjatë konferencës së përbashkët me homologun turk, Mevlut Cavusonglu. Gazetari ukrainas e pyeti për grurin për të cilin akuzoi Rusinë që e ka vjedhur gjatë periudhës së konfliktit dhe e ka shitur. Lavrov nuk pranoi akuzat e gazetarit ndërsa u shpreh se Rusia nuk ka vendosur pengesa për tregtimin e grurit.
“Përveç grurit, çfarë tjetër ka arritur të shesë Rusia nga ato që i ka vjedhur Ukrainës?”, e pyeti gazetari i Televizionit Publik të Ukrainës, Muslim Umerov.
“Ju ukrainasit jeni gjithmonë shumë të shqetësuar me atë që mund të vidhni dhe besoni se të gjithë mendojnë si ju! Do të të përgjigjem! Po zbatojmë synimet që kemi shpallur publikisht: zhdukjen nga Ukraina lindore të shtypjes dhe regjimit neonazist. Këtë po bëjmë. Sa për grurin, e kemi shpjeguar se gruri mund të transportohet i sigurt. Rusia nuk po vendos pengesa”, tha Lavrov.
Ai vuri gjithashtu në dyshim faktin se Presidenti i Ukrainës është në drejtim të vendit të tij.
Discussion about this post