Ditën e sotme në Komisionin e Veprimtarisë Prodhuese është miratuar paketa e re fiskale, në cilën kërkohet dhe rritja e taksës së akcizës për gazin. Duke marrë për bazë vlerën e re të akcizës që do të jetë 6 lekë për litër , dilet në përfundimin e se çmimi i gazit në treg do të shkojë 71 lekë për litër pavarësisht për të gjitha kategoritë.
Por, kjo gjë nuk është pranuar nga opozita, ata votuan kundër paketës fiskale dhe miratimi i saj u bë vetëm me votat e mazhorancës. Nga ana tjetër një kritik për ndryshimet fiskale ka ardhur edhe nga radhët e maxhorancës. Gjatë diskutimeve në Komision, deputeti i PS Ismet Beqiraj, si një specialist i fushës, ka propozuar që të mos rëndohen familjarët përmes unifikimit të akcizës së gazit të lëngshëm, por të përdoret procesi i markimit. Por, propozim i cili nuk është marrë në konsideratë.
Pas miratimit të ndryshimeve fiskale, Kryetari i Komisionit është shprehur se propozimet do të kalojnë në formë rekomandimesh pranë Komisionit të Ekonomisë dhe Financave, ku do të përfshihet edhe propozimi për përjashtimin e familjeve nga akciza e gazit.
Sakaq, bëjmë me dije se në relacionin që shoqëron projektligjin e ndryshimeve në nivelin e akcizës, bëhet me dije se kjo iniciativë është ndërmarrë për të ulur evazionin në treg, pasi deri më sot akciza ishte 8 lekë/litër mbi gazin që përdorej për automjetet dhe zero lekë/litër mbi gazin që përdorej për qëllime të tjera si biznesi apo nga konsumatorët familjarë.
Qeveria justifikohet se, ky projektligj synon të vendosë një nivel akcize për gazin e lëngshëm pa diferencuar qëllimin e përdorimit, pasi siç është formuluar ligji aktualisht jep mundësinë e abuzivizmit me sasinë e gazit që nuk paguan akcizë. Ndërkohë që theksohet gjithashtu se pas më shumë se një viti kontrollesh në zinxhirin e plotë të tregtimit të gazit, është konstatuar se unifikimi është e vetmja zgjidhje për uljen e evazionit në treg. Ndërkohë, sa i takon çmimit të gazit aktualisht, sipas Ministrisë së Financave, rritja ka ardhur për shkak të rritjes së bursës me 110 për qind. Arsyetim, i cili është kundërshtuar nga opozita duke i kërkuar qeverisë që të mos mbingarkojë barrën fiskale për familjarët.
Discussion about this post