Përmes një postimi në “Facebook”, deputeti demokrat, Gazment Bardhi, reagon pas deklaratave të kreut të PD, Sali Berisha, të bëra këtë mbrëmje në emisionin “Open”, se në vitin 2005 erdhi në pushtet me premtimin për të mos toleruar korrupsionin, por sipas tij, Fatos Nanon nuk e dënoi, pasi ai kishte bërë një herë burg. Bardhi thekson se kjo deklaratë e Berishës “është thelbi i sistemit të kalbur politik që ka ndërtuar trekëndshi i korrupsionit në këto 30 vite”.
“Deklarata e Sali Berishës se erdhi në pushtet në 2005 me premtimin “zero kompromis ndaj korrupsionit”, por mori vendim politik për ti ikur premtimit dhe për të amnistuar korrupsionin e qeverisë së Fatos Nanos, meqenëse ai i dorëzoi pushtetin, është thelbi i sistemit të kalbur politik që ka ndërtuar trekëndëshi i korrupsionit në këto 30 vite. Deklarata e sotme shpjegon atë të para pak ditëve se në 2013 Sali Berisha e dorëzoi vetë pushtetin, duke ndjekur kështu Sali Berisha modelin e Fatos Nonos dhe Edi Rama modelin e Sali Berishës. Tani po luftojnë për “kush e ka radhën”, duke vazhduar amnistinë dhe duke marrë peng Shqipërinë. Korrupsioni dhe amnistia ndaj tij ka marrë peng Shqipërinë në këto 30 vite. Pa ndëshkuar korrupsionin 30-vjeçarë nuk ka kurrë të ardhme për Shqipërinë. Ëndrra e demokratëve dhe shqiptarëve për “Shqipërinë si gjithë Evropa” bëhet realitet vetëm duke i dhënë fund pandëshkueshmërisë dhe korrupsionit. Ndyshe jemi në vendnumëro dhe ndryshojnë vetëm emrat e të korruptuarve!” – shkruan Bardhi në facebook.
Discussion about this post