Flutura Açka, deputete e PD-së, e cila është autorizuar nga Lulzim Basha, për të drejtuar Grupin Parlamentar demokrat, u largua sot nga mbledhja e Konferencës së Kryetarëve, pas prezencës së kolegut të saj Gazment Bardhi.
Ky i fundit ishte njoftuar për mbledhjen nga Kryeparlamentarja Lindita Nikolli, përmes një e-mail zyrtar, me cilësinë e Kryetarit të Grupit Parlamentar të PD-së.
Ndërkohë që Açka ishte prezente në mbledhje si Kryetare e Komisionit Parlamentar të Mediave.
Në një reagim, Açka sqaron se u largua nga mbledhja sepse nuk dëshironte që të krijohej kaos, ndërsa tha se PD-në nuk e ndihmon një situatë e tillë.
“Vetëm distanca higjenike nga interesi personal i çdokujt mund ta ndihmojë PD”, tha Açka. Në vijim ajo sqaron se Kuvendi nuk është shprehur se cilin njeh për Kryetar të Grupit Parlamentar.
“Kuvendi NUK u shpreh dhe shpresoj të shprehet shpejt, sepse, siç edhe thashë në Konferencën e Kryetarëve, nga e cila u largova të mos e bëj qesharake situatën mes kolegëve të mi, me të cilët më shumë gjëra më bashkojnë se më ndajnë – “dy dado e vrasin fëmijën!”.
Do t’i lutesha medies të jetë korrekte me çdo lajm. Vetë nuk do të bëj kurrë lajme me sms, sepse fyej veten dhe medias së cilës (mund) t’ia çoj.
Partia Demokratike nuk ndihmohet me kaos, por me distancë higjienike nga interesi personal i çdonjërit prej nesh, me përgjegjësinë politike të deleguar nga shqiptarët”, shkruan Açka.
Discussion about this post