Zamira Durda e ka konsideruar një lajm të mirë, kërkesën e Prokurorisë së Posaçme kundër Korrupsionit dhe Krimit të Organizuar depozitimin e kërkesës për çështjen e Gërdecit. Durda, e cila humbi djalin e saj të mitur në tragjedinë e Gërdecit, tha në një intervistë për ABC News, se drejtësia po bën disa hapa por duhet parë vendimi përfundimtar.
“Një lajm i mirë, po nuk e di a do vendoset gjykim në themel. Drejtësia them se po hedh disa hapa, por duhet të shohim përfundimin. Jemi mësuar se nis hetimi, por vendimet janë qesharake. E kam thënë që Gërdeci ndodhi që në fillim nga korrupsioni dhe babëzia për para. Ai vetëm aksident teknologjik nuk ishte. Janë me prova që asnjë tenknologji nuk kishte aty, nëse do kishte nuk do kishim viktima,” -u shpreh ajo.
Ndër të tjera, Durda tha se do të vijojë të shpresojë për drejtësi edhe pse ka rezerva në akuzën e ngritur ndaj Fatmir Mediut.
“Kam shpresuar, shpresa vdes e fundit. Rruga është e hapur deri në Strasburg. Akuza nuk duhet të jetë thjesht ‘shpërdorim detyre’. Nuk kemi shpërdorim detyre me pasoja në buxhet, por është vrasje. Kam akuzuar institucionet shtetërore për vrasje. Fëmijën tim e vrau shteti. E akuzoj Ministrin e Mbrojtjes se transporti bëhej me makina të ushtrisë. Municionet ishin në dete e male erdhën në fushë të hapur, me urdhër të ministrisë së Mbrojtjes,” -vijoi më tej Zamira Durda.
2 vite pas rihapjes së hetimeve, SPAK ka vendosur që të dërgojë në Gjykatën e Posaçme kundër Korrupsionit dhe Krimit të Organizuar ish-ministrin e Mbrojtjes gjatë kohës kur ndodhi tragjedia që mori 26 jetë njerëzish. SPAK kërkoi rigjykimin e Fatmir Mediut, pasi e akuzon si një nga ish-zyrtarët përgjegjës për tragjedinë e Gërdecit, me 26 të vrarë dhe qindra të plagosur.
Discussion about this post