Gjykata e Posaçme i cakton masën e sigurisë arrest në burg për baronin e drogës, Gëzim Çela pak ditë pas ekstradimit nga Kosova.
Seanca është zhvilluar me dyer te mbyllura, ndërsa Çela nuk ka pranuar të japë sqarime.
Avokati i Gazim Çelës ka kërkuar masën e sigurimit arrest në shtëpi me argumentin se nuk ka prova që ta lidhin atë me trafikun e drogës gjatë operacionit “flakë në det”
Po ashtu Gëzim Çela ka nisur që të shlyej edhe dënimin e dhënë nga Gjykata e Apelit për Krime të Rënda në 7 dhjetor 2015. Në atë kohë, Çela është dënuar për trafik droge me 10 vite e 8 muaj burg.
Çela u arrestua më 9 dhjetor në fshatin Dardani të Ferizajt nën shoqërinë e dy vajzave nga Shqipëria. Me të ishte dhe personi që e ka strehuar për një kohë në shtëpinë e tij në një fshat të Vitisë.
Gjatë kontrollit nga Policia e Kosovës në të njëjtën shtëpi u gjet dhe sekuestrua një kallashnikov me 15 fishekë. 55-vjeçari, i konsideruar si një prej kokave më të mëdha të trafikut të kokainës dhe heroinës në Evropë, ishte shpallur në kërkim nga SPAK në operacionin “Flakë në Det” në 9 tetor 2023, pas disa muajsh hetime ku më 15 gusht u godit një grup kriminal që tentoi të shkëmbej lëndë narkotike në mes të detit.
Discussion about this post