Kryetari i Komisionit të Medias, Agron Gjekmarkaj, ka denoncon sot, përmes një shkrimi, se kreu i Akademisë së Shkencave, Skënder Gjinushi, po shkrin Akademinë e Studimeve Albanologjike.
Në shkrim, Gjekmarkaj shkruan se ky vendim është kundër pavarësisë së institucioneve dhe se kjo qeveri synon kalimin e albanologjisë si filial.
“Vendimi politik për ta shkirë Akademinë Albanologjike dhe për ta shndërruar në filial të Akademisë së Shkencave të Gjinushit, është de facto akt kundër shkencës, kundër albanologjisë, kundër pavarësisë së institucioneve. Akademia albanologjike drejtohet nga një rektor dhe senat të zgjedhur me votë në korrik 2021, të dekretuar nga Presidenti dhe të njohur me ligj nga Ministria e Arsimit. Papritur, me një nismë politike të Gjinushit, qeveria inicon mbylljen e albanologjisë dhe kalimin e saj si filial tek seksionet e akademisë së shkencave”, ka shkruar ai.
Deputeti demokrat, i drejtohet qeverisë, si kryetar i Komisionit të Medias, duke i bërë thirrje të tërhiqet nga kjo nismë dhe të respektojë ligjin e Kushtetutën.
“Në emër të Komisionit të Edukimit dhe të Mjeteve të Informimit i kërkoj qeverisë të tërheqë nismën dhe të respektojë ligjin e Kushtetutën. Apeloj Presidentin si dekretues, ministria e arsimit si institucion përgjegjës dhe vetë senati i albanologjisë duhet të flasin dhe të dëgjohen për të dhënë sqarime për qëndrimet dhe vendimet e tyre në raport me ligjin dhe Kushtetutën. Komisioni do ta ndjekë këtë problem në të gjitha fazat e tij duke mos lejuar që shkenca të nëpërkëmbët nga të emëruarit e fundit të Byrosë Politike në Shqipëri”, ka shkruar ai.
Ai shton se krijimi i Akademisë së Shkencave si strukturë drejtuese me varësi institute të ndryshme kërkimore ka qenë praktikë e vendeve ish komuniste. Ndërsa shton se asnjë vend tjetër europian nuk e ka më atë strukturë të vjetër ideologjike, duke profilizuar shkencat në institute kërkimore dhe duke u lënë role honorifike akademive.
