Deputeti demokrat, Agron Gjekmarkaj pati një përplasje me ministrin Blendi Gonxhe, i cili po raporton në Komisionin e Edukimit këtë të martë.
Gjekmarkaj ka kërkuar informacion nga ministri se a ka një datë kur do të hapet konkursi ndërkombetar për ndërtimin e një memoriali në nder të ikonës së letrave shqipe, Ismail Kadare.
Po ashtu ai u shpreh se në Ministrinë e Kulturës nuk pati asgjë, as një status hipokrit e mediokër siç ndodh rëndomnë nderim të 100 vjetorit të At Zef Pllumit.
“Më emocionoi shumë fjala justifikuese e zonjës Kushi, por vë re një gjë, sa më pak serioze është Ministria e Kulturës aq më shumë njerëz merr me vete për ta konfirmuar paradoksin! Nejse nuk desha të merresha me këtë po me një sensibilitet kulturor për aq sa zoti Gonxhe ndihet ministër kulture!
Në korrik u nda nga jeta mjeshtri i madh i letrave botërore Ismail Kadare! Ceremonia ndaj tij la shumë për të dëshiruar në shumëçka! Shkrimtari i shqiptarëve, por edhe i Europës, i mbi 48 gjuhë të përkthyer nuk ishte shkrimtari vetëm i PS ! Ikja e tij është një nga më të mëdhatë që në shekuj ka patur ky komb ! Vdekja e çdokujt meriton respekt, para saj jemi të gjithë të barabartë, por nuk jemi të tillë në kontribute e trashëgimi, nëse do të pyeteshin të gjithë njerëzit e jashtëzakonshëm e të zakonshëm , madje nëse shkojmë në mistike nëse bëhej një referendum i të gjallëve dhe të vdekurve të gjithë do binin dakort që Ismail Kadare nuk duhej të ishte në Tufinë sot! Mjafton vetëm rruga për ato varreza si në Kandahar për të na turpëruar kur një kamerë e huaj do i ngjitet asaj, jo thjesht për Ismail Kadarenë , po e po për atë por edhe për gjithë ata shqiptarë që prehen atje!
Kur shteti shqiptar, qeveria dhe ministria e kultures do i gjejnë vendin e merituar Kadaresë, kur do të hapet një konkurs ndërkombëtar për vendin e tij e të përheshëm të prehjes? A ka një datë?
E dyta, para pak ditësh ishte 100 vjetori At Zef Pllumit ! Në Ministrinë tuaj nuk pati asgjë, as një status hipokrit e mediokër siç ndodh rëndom! Ky duhej te ishte viti i At Zef Pllumit , por ju e keni të vështirë të pranoni në ndërgjegjen tuaj përmasën e jashtëzakonshme të autorit të ‘rrno vetëm për me tregue’ të atij shqiptari që me memoriet e tij i dëshmoi qytetërimit tonë se çfare është njeriu në tirani, kush qëndroi e kush u thye! E keni të gjithe ju të vështire ta pranoni përmasen e fratit të kujtimeve, sepse ai dëshmoi përgjithmonë krimet për të cilat askush nuk kërkon falje , askush nuk bën ndarjen etike! Unë nuk kërkoj luftë klasash, nuk kërkoj fajin e gjyshërve e të baballarve tek bijt, por kërkoj reflektim tek ata, distance morale. Duhej te ishte viti i At Zef Pllumit , duhej ribotuar vepra e tij, duhej sensibilizuar shoqëria edhe për mesazhet e tij sepse tashme i përkthyer në gjuhët e mëdha të botës edhe ai e ka tejkaluar vullnetin e burokratëve, por janë burokratët ata që i bëjnë dëm shoqërise duke e privuar nga vlerat e veta sublime, duke i futur paafteësi e keqdashje komunikimit të tyre me shqiptarët!”, u shpreh Gjekmarkaj.
Discussion about this post