Ekuadori dhe Gjermania përballen në stadiumin “New York New Jersey” në një ndeshje me rëndësi të ndryshme për të dyja skuadrat.
Amerikanojugorët kanë nevojë për një rezultat pozitiv për të mbajtur gjallë shpresat e kualifikimit, ndërsa Gjermania e ka siguruar tashmë kalimin në fazën eliminatore.
Ekuadori ka zhgënjyer deri tani në Kupën e Botës 2026. Pas humbjes 1-0 ndaj Bregut të Fildishtë dhe barazimit pa gola ndaj Curaçaos, skuadra e Sebastián Beccaceces ndodhet nën presion. Problemi kryesor mbetet sulmi, pasi ekuadorianët ende nuk kanë shënuar në turne dhe rrezikojnë të hyjnë në histori si vetëm skuadra e dytë e CONMEBOL që e mbyll një Botëror pa realizuar asnjë gol.
Në krahun tjetër, Gjermania ka siguruar kualifikimin falë dy fitoreve.
Pas triumfit të thellë 7-1 ndaj Curaçaos, “Pancerët” përmbysën edhe Bregun e Fildishtë me rezultatin 2-1, duke gjetur golin e fitores në minutën e 94-t.
Tashmë skuadra gjermane synon ta mbyllë grupin me pikë të plota dhe të barazojë rekordin e saj prej 12 fitoresh radhazi.
Historia e përballjeve është gjithashtu në favor të Gjermanisë, e cila i ka fituar të dy ndeshjet e mëparshme ndaj Ekuadorit. Vëmendja do të jetë te Enner Valencia, që mund të vendosë një rekord të ri për Ekuadorin në Kupat e Botës, ndërsa për Gjermaninë pritet të jetë sërish vendimtar Deniz Undav.
Statistikat sugjerojnë një ndeshje të ekuilibruar dhe me pak gola, veçanërisht duke pasur parasysh vështirësitë sulmuese të Ekuadorit dhe faktin që Gjermania e ka arritur tashmë objektivin e parë.
Discussion about this post