Në kërkesat e saj për fuqi të re punëtore, Gjermania synon vende jashtë Evropës si Brazili, Meksika dhe Indonezia, tha ministri i Punës Hubertus Heil.
“Së bashku me përfaqësuesit e ekonomisë, ne po punojmë për një strategji në vendet ku ka shumë më shumë punëtorë të rinj dhe të kualifikuar në tregun e punës sesa vende pune”, shtoi ai.
“Ne përfitojmë, por edhe vendet e origjinës. Do të investojmë në formimin profesional të të rinjve aty për aty dhe personat që do të vijnë në Gjermani do të përfitojnë nga një punë e mirëpaguar që u jep mundësinë të financojnë familjet e tyre në shtëpi”, tha Heil.
Në qershor, Heil do të udhëtojë në Brazil me Ministren e Punëve të Jashtme Annalena Baerbock për të diskutuar mundësinë e sjelljes së një numri më të madh të infermierëve, të cilët janë shumë të nevojshëm në tregun gjerman të punës.
Marrëveshje të ngjashme duhet të lidhen me Meksikën dhe Indonezinë. Siç raporton shërbimi publik ARD, qeveria gjermane po zhvillon gjithashtu diskutime për tërheqjen e fuqisë punëtore me Kolumbinë, Tunizinë, Marokun, Egjiptin, Indinë, Filipinet dhe Vietnamin.
Siç njoftoi Instituti për Ekonominë Gjermane (IW), në fund të vitit 2022, në agjencitë e punësimit në Gjermani u raportuan mbi 630,000 vende pune që nuk mund të plotësoheshin për shkak të mungesës së një fuqie të caktuar punëtore. Në Gjermani ka vetëm 33 punëtorë të kualifikuar për njëqind vende pune në sektorin e infermierëve të kujdesit shëndetësor.
Presidenti i Fondacionit për Mbrojtjen e Pacientëve, Eugen Brysch, në të njëjtën kohë kritikoi importin masiv të infermierëve dhe tregoi se potenciali për plotësimin më të lehtë të pozitave të hapura në sektorin e kujdesit ende ekziston në Gjermani, por se është e nevojshme të përmirësohen kushtet e punës për të shfrytëzuar këtë potencial dhe vendet e punës u bënë më tërheqëse.
Paga mesatare vjetore bruto në sektorin e kujdesit shëndetësor është rreth 40,000 euro.
Discussion about this post