“Gjestikulacionet bëji në teatër”, Boçi sherr në emision me…(VIDEO)

Luçiano Boçi, nënkryetar i Partisë Demokratike të drejtuar nga Sali Berisha, u përfshi në debate të forta me pedagogen Jonila Godolen në studion e “Open”. Në një moment, ka ndërhyrë edhe drejtuesja e emisionit Eni Vasili.

Boçi u shpreh se kreu i PD, Sali Berisha, ka shprehur gatishmërinë për të respektuar institucionet dhe se ditën e sotme ai ka mbrojtur Kushtetutën duke mos iu përgjigjur thirrjes së parë të SPAK.

Sipas tij ish-kryeministri sot ka rrëzuar “gjithë alibinë që ai nuk respekton institucionin e SPAK”, ndërsa shtoi se Prokuroria e Posaçme pretendonte se Berisha nuk do të respektonte këtë marrje në pyetje dhe kjo do të sillte një masë tjetër ndaj tij.

Jonila Godole tha se shpreson që hetimi ndaj Berishës të mos përfundojë në një proces farsë, ndërsa i bën thirrje SPAK që të hetojë aferat aktuale të qeverisë.

“Nga njëra anë e shoh pozitive që të dyja palët në parim janë vënë në vështirësi nga SPAK-u, edhe qeveria edhe opozita. Do të rekomandoja që të mos merret thjesht me Kompleksin Partizani që ka ndodhur para 15 vite dhe të merret me gjërat aktuale dhe t’i japë përgjigje shqiptarëve se ku është ish-zv/kryeministri? Ku po i kalon pushimet ai.

Duke njohur historinë tonë, shpresoj shumë që ky proces i zt.Berisha të mos katandisen si procese farsa siç ishte gjyqi i Nexhmije Hoxhës që u gjykua për kafe. Jemi mësuar me gjyqe që nisin me bori dhe tamtame të mëdha dhe përfundojnë si Nexhmije Hoxha u dënua për 29 mijë lekë atëherë”, tha ajo.

Pjesë nga debati:

Boçi: Ora politike nuk vendoset sipas dëshirave, por sipas influencës dhe personi që ka kapitalet më të larta në Partinë Demokratike dhe në publik është Sali Berisha. Dhe kjo ora politike vendoset me votë dhe sistemi i drejtësisë nuk vendos orë politike. Nëse merret me orën politike po bën gjyq politik. Ti pretendon që ky proces do ndërpresë orën politike të zt.Berisha. mos u bëj kaq e ngushtë.

Godole: Është ironike që ju mbroni dhe të tjerët që e mbrojnë gjithë këtë proces. Ju po më tregoni çfarë të bëj.

Boçi: Unë jam njeri politik!

Vasili: Ashtu siç është zonja

Boçi: Ka ikur nga politika.

Vasili: Kush tha? Jeni në të njëjtën regjistër dhe akuzoni njëri-tjetrin.

Boçi: Ju po bëni rolin e përfaqësimit të atyre grave në Parlament?

Vasili: Unë po bëj rolin tim që jam këtu. Mos bëj diversione.

Boçi: Gjestikulacionet bëji në teatër dhe jo mua se unë jam i ftuar dhe më respekto si i ftuar. Për ndryshe ka edhe veprime të tjera.

Vasili: Mos na trajto vetëm si gra. Jemi të barabartë këtu.