Drejtuesi i ri politik i qarkut të Elbasanit, Damian Gjiknuri duket se do të riformatojë gjithë strukturën e Partisë Socialiste të kësaj dege. Sipas “Euronews Albania”, Gjiknuri ka shkarkuar edhe drejtorin e fundit të vendosur nga paraardhësi i tij, Taulant Balla.
Burime pranë Partisë Socialiste Elbasan bëjnë të ditur se Xhevahir Budani ka lënë pozicionin e Drejtorit Rajonal të Shëndetit Publik, ndërsa ende nuk mësohet emri i pasuesit të tij. Që nga marrja e pozicionit drejtues politik në Qarkun e Elbasanit, Damian Gjiknuri ka bërë edhe lëvizje të tjera për të larguar të përzgjedhurit e Ballës, për t’i zëvendesuar ata me të preferuarit e tij.
Më herët është shkarkuar nga detyra e Drejtorit të Tatimeve Elbasan, Indrit Karaj për t’i lënë vendin Gentian Palluqit, ndërsa ditët e fundit drejtori i Ujësjellësit, Leli Kaja u shkarkua për t’i lënë vendin Luan Tabakut.
Budani ishte i fundit nga drejtorët e njohur si mbështetës të rëndësishëm të Taulant Ballës, të përzgjedhur në postin e mbajtur pikërisht nga ky i fundit./EuronewsAlbania
Discussion about this post