Sekretari i ri i përgjithshëm i PS-së, Damian Gjiknuri është rikthyer në Dibër, qarku ku në vitin 2016 ishte i deleguari i socialistëve për të menaxhuar zgjedhjet lokale. Në takimin e sotëm, Gjiknuri prezanoi drejtuesin e ri të qarkut, i cili do të jetë ministri i Drejtësisë, Ulsi Manja.
“Dibër, takim me strukturat e Partisë Socialiste ku prezantova Ulsi Manjën si drejtues Politik të Qarkut. Jam i bindur, që me pjekurinë dhe eksperiencën e tij, Ulsiu do dijë të udhëheqë Qarkun e Dibrës drejt fitores në zgjedhjet e ardhshme. Rikthimi në Dibër është gjithnjë i veçantë. Ndjehem krenar që një angazhim e premtim i hershëm i yni për Rrugën e Arbrit po bëhet realitet ne sytë e çdo banori të Qarkut të Dibrës. Edhe në Dibër, riorganizimi i Partisë Socialiste në çdo strukturë është tepër i rëndësishëm për të dalë fitues në garën për zgjedhjet vendore të vitit 2023 dhe më tej ato parlamentare në 2025,”- shprehet Gjiknuri.
Ishte ky qark që vuri Gjiknurin në qendër të akuzave lidhur me “Dosja 184”.
Në përgjimet e publikuara nga gazeta gjermane “Bild”, Gjiknuri zhvilloi një telefonatë me Ymer Lalën, që media e ka cilësuar si bosin e mafies.
