GJKKO ka rrëzuar kërkesën e prokurorit të Vlorës Maksim Sota për ndryshimin e masës së sigurisë “arrest shtëpie”, duke i dhënë vetëm një muaj leje për lëvizje për nevoja të kujdesit shëndetësor të një familjari.
Maksim Sota është aktualisht i pezulluar nga detyra dhe po hetohet nga SPAK për shpërdorim të detyrës. Ish prokurori i Vlorës u arrestua si pjesë e operacionit ndërkombëtar “Shpirti”. Dyshimet e SPAK mbi prokurorin Sota u ngritën pas deklarimeve të bashkëpunëtorëve të drejtësisë, sipas të cilëve prokurori kishte qëndruar në një shtëpi, qiraja e së cilës ishte paguar nga Ilirjan Duçellari (Zaimi).
Po sipas dëshmive, prokurori kishte dijeni se Duçellari ishte përfshirë në trafik narkotikësh. Në dosje, sqarohet dhe përfshirja e prokurorit të Vlorës, Maksim Sota në këtë çështje.
Sipas dëshmisë së bashkëpunëtorit të drejtësisë, Mariglen Shusha, drejtuesi i grupit kriminal që merrej me trafikun e drogës Ilirjan Ducellari ( Lani ), ndihmonte pjesëtarët e tjerë kur kishin probleme me ligjin, duke paguar dhe të gjitha shpenzimet e tyre që do t’i nevojiteshin për procesin.
Këtu del dhe roli i prokurorit Sota i cili gjithashtu merrte para për të ndihmuar anëtarët e grupit që do të duhej të përballeshin me agjencitë ligjzbatuese për shkak të aktivitetit të tyre kriminal.
Në korrik, SPAK dhe Antimafia italiane finalizuan operacionin e koduar “Shpirti” në kuadër të të cilit u arrestuan 38 persona, 28 prej tyre në Shqipëri, pasi akuzohen për trafikim të lëndëve narkotike. Në pranga u vunë biznesmenëve të njohur dhe 2 ish-truprojat e ish-ministrit të Brendshëm Saimir Tahiri.
