Policia Rrugore ka ndërprerë dje në kontrollet në disa akse rrugore të kryeqytetit për shkak të reshjeve të shiut. Edhe pse, në të tilla kushtesh atmosferike, ata duhet të jenë në mënyrë të pandërprerë në terren për të parandaluar shkeljen e kodit rrugor nga shoferët e mjeteve, të cilët bëhen më pas burim aksidentetesh. Në një njoftim për shtyp në rrjetin social facebook polici bën me dije se gjatë kontrollit me radar, kanë mundur të konstatojnë vetëm disa raste të shpejtësisë tej normave të lejuara, në aksin Sauk-Teg.
“Gjatë orëve të mbrëmjes deri në orën 22:30, pasi monitorimi u ndërpre për shkak të reshjeve të dendura të shiut, si rezultat i monitorimit me radar në aksin Sauk-Teg, konkretisht në Mjullbathore, Policia Rrugore e Tiranës konstatoi 10 raste të shpejtësisë tej normave të lejuara, shpejtësi që varionte nga 131 km/h deri në 156 km/h. Policia Rrugore u pezulloi drejtuesve të automjeteve lejen e drejtimit nga 1 deri në 5 muaj dhe masë administrative nga 10.000 deri në 20.000 lekë të rinj, si dhe zbritje nga 3 deri në 6 pikë nga leja e drejtimit”, thuhet në njoftimin për shtyp.
Gjobat për parandalimin e manovrave të shpejtësisë nuk kanë sjellë rezultat. Duket se policia rrugore nuk është treguar “e ashpër” sa duhet, sepse pavarësisht masave administrative, sidomos në muajt e fundit, ende ka shumë “kokëfortë” që injorojnë rregullat dhe thirrjet duke vijuar me shkeljet e kodit rrugor.
