Në një reagim zyrtar pas ngjarjes së rëndë që tronditi sistemin gjyqësor dhe opinionin publik shqiptar, Gjykata e Lartë ka njoftuar thirrjen e një mbledhjeje të jashtëzakonshme kombëtare të gjithë gjyqtarëve të Republikës së Shqipërisë, si shenjë bashkimi dhe force morale përballë dhunës dhe kërcënimeve ndaj drejtësisë.
Sipas njoftimit, mbledhja do të mbahet të enjten, më 9 tetor 2025, në orën 10:00, në ambientet e Këshillit të Lartë Gjyqësor, dhe është autorizuar nga Kryetari i Gjykatës së Lartë pas dakordësisë së të gjithë gjyqtarëve dhe zëvendëskryetarëve të gjykatave në vend.
“Ngjarja e dhimbshme ka nxjerrë në pah jo vetëm gjendjen e brishtë të sigurisë, por edhe rëndësinë e respektit që duhet të shoqërojë ushtrimin e funksionit gjyqësor”, thuhet në deklaratën e Gjykatës së Lartë.
Ky takim do të shërbejë si një moment reflektimi, solidariteti dhe qëndrueshmërie për të gjithë trupën gjyqësore, e cila, sipas deklaratës, do të përcjellë tre mesazhe të qarta:
-
Asnjë akt dhune nuk do ta përkulë drejtësinë;
-
Asnjë kërcënim nuk do ta ndalë gjyqtarin të kryejë me ndershmëri detyrën;
-
Asnjë presion politik apo publik nuk do të cenojë pavarësinë e gjykimit.
Gjykata e Lartë thekson se gjyqtarët shqiptarë do të qëndrojnë të bashkuar dhe të vendosur për të mbrojtur jo vetëm jetën dhe dinjitetin e tyre, por edhe të drejtën e qytetarëve për një drejtësi të pavarur dhe të paanshme.
Në përfundim, trupa gjyqësore u drejtohet qytetarëve me një thirrje për mirëkuptim dhe besim:
“Drejtësia nuk është armike e askujt, por mburoja më e fortë e shoqërisë ndaj padrejtësisë dhe dhunës. Ky është një moment që kërkon forcë, qetësi dhe unitet. Drejtësia shqiptare do të vazhdojë misionin e saj me dinjitet, besim dhe vendosmëri.”
Mbledhja e 9 tetorit pritet të jetë një ndër momentet më të rëndësishme të reagimit institucional të sistemit gjyqësor pas vrasjes së gjyqtarit Astrit Kalaja, dhe një sinjal i fortë për qëndrueshmërinë e drejtësisë përballë çdo forme frikësimi apo sulmi.
Discussion about this post