Gjykata Kundër Korrupsionit dhe Krimit të Organizuar caktoi masën e sigurisë arrest me burg për Kreshnik Farrukun (Budlla), Julian Kollçakun dhe Maksim Ndocin.
Budlla u arrestua të premten, ndërsa ishte në masën e sigurisë “arrest në shtëpi” me qëllim ekstradimi drejt Italisë. Ndërsa Kollçaku dhe Ndoci janë arrestuar që në Nëntor 2024.
Ata akuzohen për trafik ndërkombëtar të lëndëve narkotike dhe grup të strukturuar kriminal. Kujtojmë se Budlla u vetëdorëzua në policinë e Durrësit.
Disa kohë më parë autoritetet tona zhvilluan një operacion duke kontrolluar banesën e Kreshnik Farrukut dhe objekte të tjera për llogari të Prokurorisë së Breshias. Gjatë atij kontolli hetuesit nuk gjetën dot Kreshnik Farrukun, por sekuestruan celularin e tij që u gjet i hapur, aparati telefonik i është nënshtruar akt ekspertimit teknik nga SPAK.
Autoritetet italiane pretendonin se Kreshnik Farruku pastronte para përmes një rrjeti kompanishë të drejtuara nga një organizatë italo-kineze. Sipas Prokurorisë së Breshias, këto kompani kanë lëshuar fatura fiktive dhe kanë arritur që të pastrojnë rreth 375 milionë Euro.
Kreshnik Farruku dyshohet për trafik droge në kuadër të grupit të strukturuar kriminal dhe pastrim parash. Emri i Kreshnik Farrukut është përmendur prej vitesh nga drejtësia e Spanjës dhe Italisë për shkak të dyshimeve se ishte i përfshirë në trafik droge.
Për herë të parë emri i tij është përmendur në vitin 2010 nga drejtësia spanjolle. Në atë kohë ai u arrestua në Spanjë me 20 kg kokainë. 4 vite më vonë në vitin 2014, Kreshnik Farruku është arratisur nga burgu në Spanjë për tu riarrestuar në vitin 2019.
Discussion about this post