Presidenti Ilir Meta duket se është i pashqetësuar nga vendimi që gjykata Kushtetuese mund të marrë sot për fatin e tij. Përmes një postimit në Facebook, Meta tregon se ka nisur muajin shkurt duket dëgjuar Ritën dhe kalendarin artistik të Shkodrës, ndërsa e konsideron 1 shkurtin si një ditë të bukur.
“Ku ka më bukur kur e nis ditën duke dëgjuar Ritën dhe kalendarin artistik të Shkodrës”, shkruan Meta krahas fotos.
Kushtetuesja do nisë sot në orën 10:00 seancën për shqyrtimin e kërkesës për shkarkimin e Presidentit Metës. Dy javë pas shtyrjes së seancës që ishte planifikuar të mbahej më 17 janar, por që relatori rezultoi me Covid-19, sot Kreu i Shtetit përballet me Kushtetuesen.
Në sallë të dyja palët do të lexojnë argumentet se përse sipas tyre Meta duhet të shkarkohet apo të qëndrojë President. Vetë Kreu i Shtetit ka deklaruar publikisht se nuk do të jetë i pranishëm në seancë, pasi sipas tij, e gjitha kjo procedurë ka nisur për shkak të një interviste që ka dhënë në media, por që do të dërgojë një përfaqësues ligjor.
Edhe nëse Kushtetuesja do të vulosë shkarkimin e tij, Kreu i Shtetit është shprehur se do ta ankimojë në gjykatat evropiane.
Discussion about this post