Pas prokurorit, Veliaj i gjen një kleçkë edhe gjyqtares, avokatët kërkojnë përjashtimin

Avokatët mbrojtës të kryebashkiakut të Tiranës, Erion Veliaj, kanë kërkuar përjashtimin e gjyqtares Flora Hajredinaj nga trupi gjykues që po shqyrton në themel çështjen penale ndaj tij në Gjykatën e Posaçme, duke pretenduar se ka konflikt interesi.

Sipas kërkesës së depozituar nga mbrojtja, motra e gjyqtares, Teuta Gjunkshi, është në një proces gjyqësor me Bashkinë e Tiranës, pasi është larguar nga puna. Sipas avokatëve, kjo çështje vijon të shqyrtohet në Gjykatën e Apelit.

Në kërkesë thuhet gjithashtu se bashkëshorti i Teuta Gjunkshit, Xhemal Gjunkshi, ish-deputet i Partisë Demokratike dhe funksionar politik i kësaj force, ka shprehur publikisht qëndrime kritike ndaj Erion Veliajt.

Mbrojtja argumenton se këto rrethana, të marra së bashku, përbëjnë arsye për përjashtimin e gjyqtares Flora Hajredinaj nga trupi gjykues, pasi, sipas saj, mund të krijojnë dyshime të arsyeshme mbi paanshmërinë e gjykimit.

Kujtojmë se Veliaj ka kërkuar edhe përjashtimin e prokurorit Ols Dado, të cilin e ka hedhur në gjyq se nuk ka kryer Magjistraturën dhe për rrjedhojë nuk duhet të jetë në organet e Drejtvsisë.

gijotina.com/