Është zbardhur shkaku i zjarrit në banesën te Materniteti i ri, ku si pasojë e asfiksisë humbi jetën një foshnjë 6-muajshe. Gjyshja dhe nipi i saj 6-muajsh ndodheshin në banesë, kur flakët e qiririt shkaktuan zjarrin që përpiu bodrumin dhe tërë banesën.
Banorët e lagjes që ishin dëshmitarët e ngjarjes thanë se 4 orë para ngjarjes, e moshuara Janulla Lilaj kishte shkuar të blinte qirinj në një dyqan afër banesës së saj, pasi nuk kishte energji elektrike, sepse ia kishin ndërprerë.
E moshuara nuk kishte paguar energjinë elektrike. Teksa ndodhej vetëm në banesë me nipin e saj, gjyshja kishte ndezur qiriun dhe e kishte vendosur mbi komodinë. Të moshuarën e ka zënë gjumi dhe e ka lënë qiriun ndezur. Komodina, ku ishte vendosur qiriu, ka marrë flakë dhe më pas flakët janë shpërndarë në të gjithë banesën. E moshuara është zgjuar nga gjumi dhe, kur ka parë flakët, ka dalë jashtë banesës për të kërkuar ndihmë.
Discussion about this post