Kreu i Bashkisë Elbasan, Gledjan Llatja nuk di të zhvillojë prokurime në bazë të ligjit, se ndryshe nuk kënaqen miqtë. Prandaj, çdo tender është mbyllur me biznesmenë që njihen për abuzime. Dy tenderët e fundit që kapin vlerën e 20 milionë lekëve, Llataj ia ka falur të favorizuarës së tij, Blerina Sadiku (Kapedani).
Tenderi i parë është me objekt “Blerje uniforma dhe veshje për Shërbimin e MSZH-se dhe strukturat Vullnetare” dhe fond 1.391 770,00 lekë. Ky prokurim është mbyllur në mungesë të konkurrencë, duke shkaktuar risk të lartë për abuzim.
Sipas Kryebashkiakut, 10 milionë lekë do të shkojnë për uniformat e zjarrfikësve, pra do të gjenerojnë fitim për biznesmenen Blerina Sadiku. Prej vitesh zjarrfikësit ankohen se nuk kanë veshjet e duhura që t’i mbrojnë në punën e tyre. Tani që po afrohen zgjedhjet, pritet të “zgjidhet” problemi. Por, puna ka nisur në mënyrë të gabuar, teksa shohim që tenderi është i paracaktuar për Sadikun. Ajo ka aplikuar si person fizik për këtë tender dhe nuk ka pasur asnjë konkurrent. Kështu, në pak ditë është shpallur fituese.
10 milionë lekë për pajisje
Në të njëjtën ditë Llatja e ka “qerasur” Blerina Sadikun edhe me një tjetër tender. Ai ka vlerën 1.292. 500,00 lekë të reja dhe gjithashtu, është mbyllur pa garë. Në dokumentin e publikuar vihet re se e në këtë prokurim konkurrentja e vetme kaq qenë Blerina Sadiku. Bëhet fjalë për tenderin me objekt “Blerje uniforma dhe veshje për Shërbimin e MSZH-së dhe strukturat Vullnetare”. Sadiku e përfitoi menjëherë pa garë dhe për këtë arsye tenderi është klasifikuar me “Red Flag’ nga Open Data.
Mashtrimet e Sadikut
Kështu, me tenderë pa garë, Blerina Sadiku ka arritur të mbushë arkën e saj. Sipas të dhënave të publikuara nga Spending Data Albania, vetëm në 2 vitet e fundit, Blerina Sadiku ka arritur të rrëmbejë 88 kontrata. Për këto kontrata janë derdhur nga institucionet, kryesisht bashkitë, 74,253,579.00 lekë.
Ndërkohë, që nga viti 2019, Sadiku nuk e kryen raportimin e pasqyrave financiare. Pra, për vitet 2020 dhe 2021 nuk ka asnjë raport, që Blerina të tregojë të ardhurat. Mirë Tatimet që mbyllin sytë, por bashkitë pse vazhdojnë t’i japin fonde pa kontrolluar më parë përmbushjen e kritereve.
Edhe po të marrim për bazë të ardhurat e deklaruara në vitin 2018 dhe 2019, kompania e Blerina Sadikut nuk ka potencial financiar për të përballuar këtë tender. Në një vit janë raportuar maksimalisht 8 milionë lekë të reja fitime, vlerë shumë e ulët përballë kërkesave të tenderit.
Nga ana tjetër, fitimi i deklaruar bie në kontradiktë me numrin e lartë të tenderëve miliarda lekësh që ka fituar ajo. Mbase ky është dhe shkaku që Sadiku nuk ka pasqyruar fitimet për 2 vitet e fundit.
Lexo edhe: Tenderi i 3-të/ Llatja në “gjurmët” e Sejdinit: Tender për të vëzhguar qytetarët
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post