“Tetë të arrestuar, 5 shqiptarë, 2 tunizianë, 1 italian, 30 persona në hetim, 10 kilogramë kokainë dhe heroinë dhe 30 mijë euro cash e sekuestruar”, është ky rezultati i megaoperacionit të Policisë në Padova ndaj një grupi kriminal shqiptaro-italian që bënte trafik të lëndëve narkotike nga Shqipëria në Itali, kokat e të cilit mendohet se veprojnë nga Shqipëri.
Akuza për 8 të arrestuarit është përfshirja në grup kriminal me qëllim trafikimin, posedimin dhe tregtimin e drogës.
“Edhe sot ligji ka shënuar një pikë të mirë në favor të saj në luftën kundër drogës, falë Drejtorisë së Qarkut Antimafia të Venecias dhe Guardia di Finanza të Padovës, bashkëpunimi i përsosur i të cilëve çoi në sekuestrimin e një sasie të re të madhe. 10 kilogramë heroinë dhe kokainë, me tetë të arrestuar, 30 nën hetim dhe 30 mijë euro të sekuestruara. Me mirënjohje i shpreh komplimente DDA të Venecias dhe GDF të Padovës”- tha në një konferencë për shtyp presidenti i Rajonit Veneto, Luca Zaia.
Hetimet janë kryer nga komanda provinciale e Guardia di Finanza dhe kanë përfunduar në fund të gushtit, për llogari të Drejtorisë së Qarkut Antimafia të Venecias. Objektivi i aktivitetit që vazhdoi për disa vite ishte çmontimi i një trafiku ndërkombëtar droge që lëvizte në aksin Shqipëri-Itali. Baza e logjistikës në Itali ishte Lombardia, konkretisht Milano dhe Varese. Nga këtu droga, në varësi të kërkesave, arrinte në Padova.
Sipas hetuesve, droga është nisur drejt Italisë e fshehur në një fund ‘të rremë’ të makinave. Mjetet lëviznin në dy drejtime, me embarkacion (me traget) ose në rrugë tokësore. Lëvizja e makinave kontrollohej nga një zinxhir anëtarësh të organizatës që ishin aty për t’i shpëtuar kontrolleve. Anëtarët e grupit komunikonin me telefona që ishin të koduar dhe për këtë arsye bëheshin shumë të vështirë për t’u përgjuar.
Raportet e përditshme të hetuesve që ndiqnin rastin bënë të mundur rindërtimin e të gjithë organigramës së bandës kriminale, të përbërë nga dy grupe të dallueshme, një grup shqiptar dhe një tjetër italian, të cilët vepronin midis Padovës dhe Selvazzano-s. Në fakt, ata ishin në kontakt me një sindikatë kriminale shqiptare me bazë në Lombardi, e aftë për të furnizuar me sasi të mëdha kokaine dhe heroinë bashkatdhetarët e tyre në Veneto dhe celulat e ndryshme në veri të Italisë.
Në dritën e provave që dolën, hetimet e drejtuara nga Prokuroria e Venecias u përqendruan te furnitorët shqiptarë, duke arritur kështu të grumbullohen prova serioze në lidhje me drejtuesit e hipotezuar të organizatës, të cilët në fakt ndodhen në Shqipëri. Në përfundim të hetimeve, përveç tetë të arrestuarve në aktin mes Selvazzano-s dhe Padovës, u arrit të identifikoheshin 30 persona, pothuajse të gjithë italianë, dhe disa tuniziane dhe shqiptare, të cilët do të duhet të përgjigjen për krime, konspiracion që synon trafikimin, posedimin dhe tregtimin e drogës. Me këtë operacion, Antimafia është e sigurt që i ka dhënë një goditje të rëndë tregut të trafikut të drogës.
Discussion about this post