Policia e Durrësit ka goditur një operacion të kultivimit të kanabisit në katin e dyte të një pallati, përshtatur për kultivimin e bimëve narkotike, me anë të llambave.
Sipas policisë, në lagjen nr. 13, Durrës, nga kontrolli në banesën e marrë me qira nga Ismail Aliaj, e cila ishte përshtatur për kultivimin e bimëve narkotike, u gjetën dhe u sekuestruan 2 kg lëndë e dyshuar cannabis sativa e tharë, e bërë gati për shitje, 110 vazo në të cilat ishin kultivuar fidanë të dyshuar cannabis sativa, 19 llamba dhe pajisje të tjera elektrike.
Në momentin e ndërhyrjes së shërbimeve policore, personi që kishte marrë me qira këtë apartament nuk është gjetur në banesë. Aliaj është shpallur menjëherë në kërkim dhe vijon puna për lokalizimin dhe kapjen e tij.
Në bashkëpunim me Prokurorinë e Rrethit Gjyqësor Durrës, po punohet për identifikimin dhe kapjen e personave të tjerë të përfshirë në këtë veprimtari kriminale.
Discussion about this post