Shqiptarët vazhdojnë të vuajnë krizën ekonomike që solli pandemia. Në këtë rezultat ka dalë Instituti i Statistikave përmes vrojtimeve të bërë në tremujorin e fundit. Në Anketën e Forcave rikonfirmohet dukuria e stanjacionit dhe fillimit të rënies të të punësuarve, forcave të punës dhe popullsisë në moshë pune. Në raport me të njëjtën periudhë të 2020-ës, INSTAT tregon se në tremujorin e 2021, shkalla zyrtare e papunësisë në Shqipëri regjistrohet në 11,3%, çka do të thotë se shkalla zyrtare e papunësisë u ul me 0,3 pikë përqindje. Gjithsesi, niveli i papunësisë mbetet shqetësues, duke marrë parasysh numrin e lartë të papunëve tek të rinjtë.
“Krahasuar me tremujorin e mëparshëm, në tremujorin e tretë 2021, punësimi për popullsinë 15 vjeç e lart u rrit me 2,4%. Punësimi u rrit me 4,9% në sektorin e industrisë, me 1,3% në sektorin e shërbimeve, dhe 2,3% në sektorin e bujqësisë”, thuhet në raport. Sipas INSTAT, punësimi nuk ka pësuar rritje dhe kjo tregon se bizneset janë në krizë pasi një pjesë e konsiderueshme vazhdon me përgjysmim stafi.
Ulja e nivelit të pagave
Ndër të tjera, në raport evidentohet se, paga mesatare në ekonomi ka shënuar ulje në tremujorin e tretë. INSTAT raportoi se paga mesatare mujore bruto për një të punësuar me pagë, gjatë tremujorit të tretë 2021 është 56.435 lekë, duke u ulur me 0.5% në krahasim me tremujorin e mëparshëm. Rënia është ndikuar nga ulja e pagave në sektorin e informacionit dhe komunikacionit (nga 88.3 mijë lekë në tremujorin e dytë 2021, në 85.2 mijë lekë në tremujorin e tretë 2021). Sakaq, theksohet se, ulje shënuan dhe pagat në sektorin e aktiviteteve financiare dhe të sigurimit, nga 120.6 mijë lekë në tremujorin e dytë 2021, në 108.6 mijë lekë në tremujorin e tretë 2021. Ajo që bie në sy është se pagat vazhdojnë të reduktohen më së shumti në sektorin e bujqësisë, i cili po shkon në pikiatë gjithmonë e më shumë.
“Gjatë tremujorit të tretë 2021, paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 92,5 % më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim është 36,9 % më e ulët. Krahasuar me të njëjtin tremujor të vitit të kaluar, gjatë tremujorit të tretë 2021 paga mesatare bruto për grupaktivitetin e Tregtisë; transportit; aktivitetet e akomodimit dhe shërbimit ushqimor, ka rritjen më të madhe prej 11,4 %, ndërsa rritjen më të vogël e ka aktiviteti i Ndërtimit prej 3,8 %”, thuhet në raport. INSTAT tregon se deri në fund të këtij viti parashikohet që niveli i pagave dhe punësimit të mbetet i ulët. E.H/gijotina.com/
Discussion about this post