Policia italiane dhe ajo shqiptare kanë dalë në një konferencë të përbashkët për të zbardhur detaje nga operacioni që çoi në arrestimin e 25 personave, mes të cilëve 18 shqiptarë, të akuzuar për trafikim emigrantësh.
Në konferencën e përbashkët, autoritetet italiane zbardhën detaje nga aksioni, duke thënë se banda e trafikut të klandestinëve drejtohej nga dy vëllezër, të cilët përdornin identitete të rreme.
“Hetimi zgjati mbi 1 vit e gjysmë. Njëri aksion ishte në Bari, ku u kryen 5 arreste. Tjetri në Torino, që përbëhej nga dy vëllezër, të cilët përdornin emra të fantazuar dhe nuk përputheshin me emrat realë. Duke qenë me emra fallso, ato ishin të kërkuar nga shumë forca policore. Hetimet e zhvilluara me teknika të përparuara na bënë të mundur të identifikonim emrat e tyre. Përmes dhe hetimeve të bëra nga GDF arritëm të kuptojmë dhe pagesat që bëheshin, që varionin nga 5 mijë deri në 10 mijë euro”, tha përfaqësuesi i policisë italiane.
Në total janë goditur 4 grupe kriminale dy prej të cilave operonin nga Italia, një në Shqipëri dhe një në Turqi të cilat bashkëpunonin për trafikimin e klandestinëve nga Lindja e Mesme, me destinacion Italinë e Jugut dhe vende të tjera të BE-së.
Nga hetimet e kryera nga SPAK, është urdhëruar arrestimi i 25 personave, si pjesë e një grupi të strukturuar kriminal, nga të cilët 18 janë shtetas shqiptarë dhe 7 shtetas të huaj.
Discussion about this post