“Goditje më të forta po vijnë”, ja ç’paralajmëron Balla

Taulant Balla, ministër i Brendshëm, ka reaguar lidhur me operacionin e Policisë së Shtetit, ku gjatë 1 jave u asgjësuan 17 mijë bimë kanabis, si dhe u arrestuan 12 persona, mes të cilëve edhe 3 ushtarakë.

Ndërsa ka përgëzuar Policinë për operacionin, Balla shprehet se kultivimi i paligjshëm i kanabisit ka qenë një burim financash për organizatat kriminale, duke shtuar se ky burim duhet shuar përfundimisht. “Goditje të tjera më të forta po vijnë”, paralajmëron ministri i Brendshëm.

Postimi nga Balla

Lufta kundër kultivimit, trafikimit dhe shpërndarjes së lëndëve narkotike do të jetë sistematike. Shqiptarët presin një pastrim të territorit tonë nga kultivimi i paligjshëm i bimëve narkotike.

E përgëzoj sot Policinë e Shtetite cila si asnjëherë më parë ka angazhuar në këtë mega-operacion kombëtar më shumë se 6000 forca policie dhe 75 dronë të cilësisë së lartë.

Deri në këtë moment janë arrestuar 12 persona, mes tyre dhe punonjës të shtetit dhe 10 të tjerë të proceduar penalisht, asgjësuar deri sot në mëngjes mbi 17 mijë bimë cannabis sativa, si dhe janë sekuestruar shuma të konsiderueshme parash si dhe armë e sende të tjera të kundërligjshme.

Kultivimi i paligjshëm i kanabisit ka qenë një burim financash për organizatat kriminale. Ky burim duhet shuar përfundimisht. Goditje të tjera më të forta po vijnë