Kryetari i zgjedhur në maj 2023, Fredi Beleri kalbet në burg për blerje votash, ndërsa Jorgo Goro vazhdon të mbajë postin e kryetarit në detyrë dhe të shijojë tenderët! Goro tani po nxiton “të kap ç’të kap” me abuzime duke shfrytëzuar detyrën, edhe për faktin se kryeministri ka paralajmëruar zgjedhje të parakohshme në Himarë.
Këtë herë Goro ka hedhur si grep tenderin me objekt “Ndërtimi i palestrës së mbyllur, Shkolla Borsh”. Investimi i bashkisë për një palestër nuk duket si prioritet për fshatin që shpesh mbetet pa drita dhe ka nevojë për ndërhyrje të thellë në infrastrukturën e rrugëve dhe kanalizimeve.
Megjithatë. mirë i bëhet Borshit ta ndërtojë palestrën. Sipas dokumentacionit, objekti do të jetë një sallë e gjatë me disa pajisje për lojëra, si për shembull; bilbila dhe topa të butë.
Si rrallë herë, për këtë projekt janë interesuar që të marrin pjesë 13 firma, prandaj pritej një garë e fortë.
Në fund të fundit janë shumë lekë për palestrën e një shkolle.
Siç bën gjithmonë, Goro me guxim i është shmangur rregullave për përcaktimin e fituesit, por i ka rënë shkurt dhe e paracaktuar.
Kryetari ka përjashtuar menjëherë nga gara 12 kompani, përveç fituesit. Madje 4 prej firmave kishin oferta më të lira se sa kompania e përzgjedhur si fituese. Gjithsesi, mbi tryezën e Goros u ul vetëm një avion prej letre që sillte zarfin me ofertën e firmës EREDA SHPK.
Kështu më datë 20 dhjetor 2023 Alqi Gjoka dhe Jorgo Goro kanë nënshkruar kontratën në shkelje të ligjit.
Dhe kësaj bashkie i shtohet një tjetër prokurim me “Red Flag” sipas vlerësimit të bërë nga Open Data Albania. Kjo është shenjë që tregon riskun e lartë të korrupsionit. Po ashtu, mund të shërbejnë si prova të qarta për SPAK-un që ka nisur të mbushë dosjet e kryebashkiakëve që abuzojnë me fondet.
Kujtojmë se Jorgo Goro është paraqitur në 5 tetor 2023 në ambientet e SPAK. Kjo për shkak se Kontrolli i Lartë i Shtetit ka konstatuar shumë shkelje dhe pabarazi në tenderët e tij. Çështja më kryesore ka të bëjë me ndërtimin e një resorti në këtë zonë dhe me proceduat se si janë dhënë lejet e ndërtimit në zonën bregdetare të Himarës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post