Përvetësimi i qindra milionë lekë të buxhetit të bashkisë mund të jetë shumë më i lehtë se sa na shkon mendja. Do t’ju sjellim një rast nga bashkia Durrës, që e ilustron këtë ide. Në atë që gjetëm mes rreshtave të një auditimi të KLSH, nuk ka sofistikim, por vjedhje e thjeshtë e një fondi. “Keqkuptimi në komunikim” dhe “grindja” mes dy zonjave të fuqishme në PS paraqitet si shkak që një fond i madh prej 330 milionë lekë të shkojë në arkën e kompanive private pa kryer objektin e prokurimit.
Fjala është për kryetaren e Bashkisë Durrës, Emiriana Sako dhe drejtoren e Agjencisë Kombëtare të Shoqërisë së Informacionit (AKSHI) Mirlinda Karçanaj. Nga auditimi i procedurës së prokurimit publik me objekt “Shtimi i funksionaliteteve të kontrollit dhe kalkulimeve të taksave, vjeljes së detyrimeve dhe menaxhimit më eficient të buxhetit fiskal në sistemin ekzistues të Bashkisë Durrës”, u konstatua se kriteret nuk janë miratuar nga agjencia dhe se me të njëjtin objekt po zhvillohej një prokurim nga stafi i Karaçanajt. Kjo ka ndodhur në vitin 2022 dhe është zbuluar në kontrollin e fillimit të këtij viti të sapopublikuar nga KLSH.
Pas kërkesës së Bashkisë Durrës drejtuar AKSHI-t për miratimin miratimin e termave të referencës dhe specifikimeve teknike për përmirësimin e sistemit ekzistues, Agjencia nuk e ka bërë këtë. Madje ka njoftuar Bashkinë Durrës që po kryhet një tender që përfshin procedurën e filluar nga kjo bashki. Edhe pas këtij njoftimi, Bashkia Durrës e ka kryer me kokën e vet prokurimin e këtij shërbimi me fond limit 32,989,483 lekë. “Ky investim, me implementimin e projektit për të cilën ka filluar procedura e prokurimit në AKSHI, nuk do të funksionojë më, duke shkaktuar përdorim pa efektivitet të fondeve të Bashkisë Durrës në vlerën 32,989,483 lekë”, konstaton me “butësi” audituesi. Më e pakta në raportet e këtij lloji është përdorimi i frazës “dëm në buxhetin e shtetit”. Por, dy zonjat për të cilat po shkruajmë janë të frikshme për pushtetin që kanë.
“Bashkia Durrës të nxjerrë përgjegjësitë për kryerjen e këtij investimi, që mund të dublohet me përfundimin e investimit nga ana e AKSHI-t”, thuhet në konkluzionin tipik të raportit.
Çfarë fshihet pas tenderit që e ka firmosur vetë Sako?
Tenderi për portalin e taksave të bashkisë Durrës ka një fond limit të caktuar nga vetë kompanitë pjesëmarrëse si operator ekonomik. Në dosje administrohen tre oferta financiare, pa datë, nga shoqëritë “I. & C.D.” ShPK me vlerë 34,550,910 lekë pa TVSH”, “ATD” ShPK me vlerë 32,328,000 lekë pa TVSH dhe “A. – C., me vlerë 32,089,540 lekë pa TVSH, të cilat i kanë shërbyer grupit të punës për përllogaritjen e fondit limit. Fondi limit ka dalë nga mesatarja e këtyre tre ofertave. Në fakt, grupi i bashkisë duhet të studionte tregun për ta bërë këtë përllogaritje.
Shkelja tjetër është klasifikimi i tenderit nga “shërbim” në “mallra”. Nga verifikimi i preventivit të këtij objekti, konstatohet se pjesa e “shërbimit” është më e lartë se pjesa “mallra” (29,150,816 lekë shërbim dhe 3,838,666 lekë mallra) dhe për këtë arsye, procedura e prokurimit, duhet të ishte përcaktuar si “Shërbim”.
Por shkelja më e madhe që synonte me patjetër nxjerrjen e këtij fondi nga Thesari i Shtetit është kryerja e tenderit pa kriteret teknike të miratuara nga AKSHI. Në dosjen e prokurimit administrohet një kërkesë e Bashkisë Durrës me nr. 7976/12, datë 21.10.2022, drejtuar AKSHI-t “Kërkesë për miratimin e termave të referencës dhe specifikimeve teknike për përmirësimin e sistemit ekzistues”, sipas të cilës kërkohet shqyrtimi dhe miratimi i këtij projekti, në përputhje me vendimin e qeverisë që e detyron këtë akt.
Pas kësaj shkrese, AKSHI me shkresën nr. 6602/1, datë 26.10.2022 i përgjigjet Bashkisë Durrës, duke e bërë me dije se në AKSHI “…po zhvillohet procedura me objekt “Digjitalizimi dhe automatizimi i proceseve të punës dhe shërbimeve online për qeverisjen vendore … Ju informojmë se në këtë procedurë përfshihen edhe komponentët e kërkuar nga ana juaj”.
Pas kësaj shkrese, në Kartelën Shoqëruese të Praktikës, nga ana e TAK është lënë shënimi që “Të vijohet procedura sipas VKB Buxhetit 2021”. Ky është shënimi i bërë me kokëfortësi nga Sako, mund të jetë një provë e fortë për SPAK, pasi tashmë kryetarja e ka vizituar organin e akuzës. Pas këtij shënimi ka vazhduar tenderi. Grupi i punës i ngritur për hartimin e specifikimeve teknike dhe përllogaritjen e fondit limit.
“Ky investim, me implementimin e projektit për të cilën ka filluar procedura e prokurimit në AKSHI, nuk do të funksionojë më, duke shkaktuar përdorim pa efektivitet të fondeve të Bashkisë Durrës në vlerën 32,989,483 lekë. Sa sipër, ngarkohet
me përgjegjësi titullari i Autoritetit Kontraktor znj. Emiriana Sako”, konkludon auditimi.
Reagimi i Emiriana Sakos përgjigja nga KLSH
Me këtë arrogancë për ta bërë me patjetër tenderin, është hartuar formulari i njoftimit të fituesit në datën 29 dhjetor 2022, i cili është nënshkruar nga titullari i AK Emiriana Sako. Paratë u xhiruan për kompanitë DATA LOG shpk – ALBITAL– CANON shpk.
Edhe përgjigja e saj ndaj audituesve tregon një refuzim të shpenguar për të shpjeguar përse e ka shkelur vendimin e qeverisë. “AKSHI na informon mbi ngritjen e grupit të punës për proçedurën me objekt “Digjitalizimi dhe automatizimi i proceseve të punës dhe shërbimeve online për qeverisjen vendore”, përgjigje në këndvështrimin tim mjaft përgjithësuese, pa dhënë një afat të përcaktuar dhe konkret për parashikimin e realizimit dhe implementimit të kësaj proçedure (nënvizoj këtu që ende Bashkia Durrës nuk është informuar nëse janë marrë hapa konkret për realizimin e këtij projekti, pasi përveç këtij dokumenti nuk është njoftuar apo të jenë kërkuar të dhëna për fillimin apo realizimin e tij). Dhe mbi të gjitha në përgjigjen e tyre nuk i kanë refuzuar specifikimet teknike”.
”Grupi i auditimit nuk e ka pranuar këtë shpjegim. Sqarojnë se nga ana e Bashkisë nuk është marrë në konsideratë fakti që për këtë shërbim kishte filluar procedura e prokurimit në AKSHI, duke urdhëruar që të vijojë edhe nga Bashkia Durrës. Sa sipër, ku observacion nuk merret në konsideratë”. Nënvizohet në auditimin e KLSH.
Duket sikur zonja Sako po e shtroka rrugën për në SPAK me shkresa të tilla ku e pranon haptazi se e ka shkelur ligjin. Dhe fatura nuk është pak, por 330 milionë lekë që shkuan në arkën e tre kompanive private.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post