Gjykata e Posaçme ka konfirmuar masat e sigurisë për të arrestuarit në kuadër të operacionit të SPAK-ut, të pak ditëve më parë, ku u godit organizata e Çopjave me bazë në Elbasan. Operacion gjatë të cilit u sekuestruan 17 ton kokainë.
GJKKO ka vendosur që shtatë nga të arrestuarit të mbeten në burg, ndërkohë që njëri lihet në arrest shtëpiak. Dy të tjerët, që ishin shoferë, janë lënë në detyrim paraqitje.
Arrest në burg:
- E. Ç
- A.Ç alias D.Ç
- P.L alias P.S
- R.M
- G.Ç
- M.K
- E. Ç
Arrest në shtëpi
- R. Ç
Detyrim paraqitje
- K.Gj
- D.P
Bëhet fjalë për operacionin e zbuluar ditën e premte, kur Prokuroria e Posaçme Kundër Korrupsionit dhe Krimit të Organizuar (SPAK) tha se kishte goditur një organizate kriminale shqiptare, e cila kontrollonte trafikun e kokainës në tregun evropian. Sipas SPAK-ut, ky grup ka tentuar të trafikojë në Evropë rreth 17 ton kokainë.
Hetimet intensive, në bashkëpunim me EUROPOL dhe autoritetet ligjzbatuese nga Belgjika, Franca, Holanda, Gjermania dhe Italia, u bazuan në analizën e komunikimeve të enkriptuara të platformës SkyECC. Organizata kriminale, e udhëhequr nga të dyshuarit me inicialet E.Ç. dhe F.G., operonte në mënyrë globale, duke bashkëpunuar me grupe të tjera për të lehtësuar transportin e drogës dhe duke investuar fitimet e mëdha në prona dhe biznese në Shqipëri dhe jashtë saj. Ngarkesat e kokainës ishin të fshehura në mënyrë të sofistikuar brenda kutive sapuni, bombolave të bojës apo materialeve të tjera të maskuara me marka tregtare të njohura.
Këto ngarkesa transportoheshin me kontejnerë detarë nga portet e Amerikës së Jugut drejt porteve të mëdha evropiane, kryesisht Anvers (Belgjikë) dhe Hamburgu (Gjermani), ku më pas shpërndaheshin përmes rrjeteve të brendshme të tregut të drogës në BE.
Discussion about this post