Hetimet e Prokurorisë së Posaçme pas zbërthimit të mesazheve të koduara në aplikacionin e komunikimit “SKY”, zbuluan edhe interesin e Plarent Derishajt dhe grupit të tij për të eliminuar fizikisht Arben Mërkurin, i njohur si “Maneci”.
Angazhimi i grupit për vrasjen e Manecit u krye pas atentatit të 1 Nëntorit 2019, kur u vra Andi Maloku dhe u plagosën ish-prokurori Arben Ndoja e Aleksandër Laho, i njohur si “Rrumi”.
Anëtarët e grupit kriminal akuzohen se pas asaj ngjarje, kanë punuar për të siguruar kushtet për vrasjen e disa personave, përfshirë edhe Manecin, i cili dyshohet se ishte lidhje e ngushte e Rrumit.
“Gjithashtu, provat e mbledhura gjatë hetimit kanë evidentuar faktin penal se shtetasit Plaurent Dervishaj, Julian Meçaj, Genti Nderjaku (alias Kili, alias Ekil), Ramazan Rraja, Bashkim Haxhija dhe Julian Pjetri, kanë konsumuar elementët e veprave penale ‘Sigurimi i kushteve dhe i mjeteve materiale për të kryer vrasje’, ‘Grupi i strukturuar kriminal’ dhe ‘Kryerja e veprave penale nga grupi i strukturuar kriminal’, të Kodit Penal, në dëm të shtetasve Arjan Ndoja, Aleksandër Laho (Pëllumb Muharremi), Vullnet Muça (alias Muharremi), Genci Maloku dhe Arben Mërkuri (Maneci), për periudhën pas ngjarjes së datës 01.11.2019 (episod i konsumuar pas ngjarjes së datës 01.11.2019)”, thotë SPAK.
Vrasja
Arben Mërkuri, i cili mbante dhe mbiemrin Ismaili, mbeti i vrarë në një atentat me armë zjarri mbrëmjen e 18 Majit 2022, në zonën e Sukthit në Durrës.
48-vjeçari u qëllua me armë zjarri brenda dyqanit të tij nga persona ende të paidentifikuar. Ai u dërgua me urgjencë në spital pasi fillimisht kishte mbetur i plagosur në gjendje të rëndë, por ndërroi jetë për shkak të plagëve.
Arben Mërkuri ishte person me precedent penal. Në skedat e Policisë së Durrësit, ai evidentohet si person me precedent në fushën e lëndëve narkotike. Ndër të tjera në skedarët policorë dyshohet për krime kundër personit, të tilla si vrasje me pagesë.
Gjithashtu, Arben Mërkuri është dyshuar si një nga personat e dyshuar që mund të ketë marrë pjesë në dhunimin barbar të biznesmenit libanez Fadi Mitri bashkë me Rrumin, ngjarja e ndodhur në vitin 2016.
Roli i Kasandër Nogës
Hetimet e mëtejshme zbuluan se interes për eliminimin e Manecit kishte Kasandër Noga. Kjo u zbulua nga dëshmia e vëlleëzvre Indrit dhe Gentian Beqirajt, të cilët rrëfyen për hetuesit disa plane ekzekutimesh.
Sipas tyre, porositës i ekzekutimit të Manecit ishte pikërisht Kasandër Noga, i arrestuar në Belgjikë. Dyshohet dy vëllezërit Gentian dhe Indrit Beqiraj kishin marrë porosi nga Kasandër Ndoga për vrasjen e Arben Manecit. Kasandër Noga, sipas tyre, nëpërmjet Kevin Zenelit, i ka paguar, për krijimin e kushteve për kryerjen e vrasjeve.
Dyshohet se Arben Maneci kishte vrarë një person të afërt të Nogës, ndaj dhe ky i fundit porositi ekzekutimin e tij si shenjë hakmarrje.
Megjithatë vrasja e Arben Mërkurit ende nuk është zbardhur plotësisht.
Discussion about this post