Ish-presidenti Bamir Topi ka dënuar aktin e rëndë që iu bë ditën e sotme kryetarit të Partisë Demokratike, Sali Berishës. I ftuar ditën e sotme në emisionin “Frontline” në News24, Topi, u shpreh se sulmi i 31-vjeçarit Gert Shehut ndaj Berishës ishte një akt i rëndë dhe i shëmtuar.
Ai ka shtuar se në lidhje me ngjarjen duhet një hetim i hollësishëm nga institucionet përkatëse.
“E rëndë dhe e shëmtuar akti ndaj Berishës. Fatmirësisht mbeti aty sepse në një situatë të tillë një i ri fizikisht i fortë mund të kalonte shumë keq situata. Por la një shije shumë të hidhur. Kjo tregon që në këtë shoqërinë tonë pavarësisht asaj që thuhet rreth personalitetit të njeriut që goditi Berishën, shumë gjëra në këtë shoqëri janë çoroditur e tjetërsuar. E dënoj këtë akt dhune dhe në rastin specifik edhe më shumë, sepse bëhet fjalë për një politikan karriere, një ish president, ish kryeministër, personalitet publik, që përtej karrierës ka edhe vite mbi supe. jemi mësuar të themi t’ja lëmë në dorë organeve ta hetojnë, por duhet një hetim i hollësishëm.
Duket si precedent i rrezikshëm, kemi kaluar situata nga më të çuditshmet, si në vitet ’90, ‘97-‘98, goditje ekstreme si vrasja e Azem Hajdarit, por një situatë e tillë që ndodh për herë të parë është një kambanë alarmi.
Edhe njerëzit që e rrethonin e truprojat ishin të pavëmendshëm sepse ishte një marshim paqeje”, tha Topi.
Discussion about this post