Pronari i pesë dyqaneve të ndryshme në Tiranë e Durrës, 52-vjeçari J.Xh ka rënë në prangat e policisë së bashku me ekonomistin e tij, 64-vjeçarin, M.Q.
Të dy ata, banues në Tiranë, akuzohen për kontrabandë mallrash. Në njoftimin zyrtar të policisë shihen dhe produktet me të cilat furnizoheshin dyqanet. Aty shihen pellushë, rripa e çanta të markave nga më të ndryshme si ‘Guçi’; ‘Louis Vuitton’ e ‘Yves Saint Laurent’, por nuk dihet nëse janë origjinale. Gjashtë punonjëset e dyqaneve janë proceduar në gjendje të lirë.
“Finalizohet me sukses operacioni policor i koduar “Shops”, i zhvilluar nga Seksioni për Hetimin e Krimit Ekonomik dhe Financiar të DVP Tiranë, në bashkëpunim me Drejtorinë për Hetimin e Krimit dhe Financiar në Drejtorinë e Përgjithshme të Policisë së Shtetit.
Tregtonin mallra të kontrabanduara, në 5 dyqane të ndryshme në Tiranë dhe Durrës, vihen në pranga 2 shtetas dhe procedohen në gjendje të lirë 6 të tjerë.
Sekuestrohen mallrat e ndryshme të dyshuara të kontrabanduara.
Specialistët e Seksionit për Hetimin e Krimit Ekonomik dhe Financiar të DVP Tiranë, në bashkëpunim me Drejtorinë për Hetimin e Krimit dhe Financiar në Drejtorinë e Përgjithshme të Policisë së Shtetit, në vijim të goditjeve të njëpasnjëshme ndaj veprimtarive kriminale në fushën e kontrabandës me mallra të ndryshme, pas një pune të mirëfilltë hetimore, si dhe bazuar dhe në informacionet e marra në rrugë operative, organizuan dhe finalizuan operacionin policor të koduar “Shops”, në kuadër të të cilit u arrestuan në flagrancë shtetasit:
– J. Xh., 52 vjeç dhe M. Q., 64 vjeç, të dy banues në Tiranë.
Gjithashtu u proceduan në gjendje të lirë shtetaset D. H., 21 vjeçe, B. G., 22 vjeçe, K. D., 22 vjeçe dhe G. G., 23 vjeçe, të treja banuese në Tiranë, si dhe E. M., 44 vjeçe e A. K., 27 vjeçe, të dyja banuese në Durrës.
Nga veprimet hetimore ka rezultuar se shtetasi J. Xh. administronte 5 dyqane të ndryshme, 3 në Tiranë dhe 2 Durrës, ekonomist i të cilëve ishte shtetasi M. Q. dhe punëtore ishin shtetaset D. H., B. G., K. D., G. G., E. M. dhe A. K.
Gjatë kontrollit, në këto subjekte u gjetën dhe u sekuestruan në cilësinë e provës materiale, produkte të ndryshme, si çanta, veshje, syze dhe parfume, të dyshuara të kontrabanduara. Kontrolli në dyqanin në Durrës, si dhe veprimet e tjera procedurale për këtë subjekt tregtar, janë kryer në bashkëpunim me DVP Durrës.”-njofton policia.
Discussion about this post