Bashkia Sarandë me në krye Adrian Gurmën po përgatit terrenin për fushatën zgjedhore. Me datë 5 dhjetor 2022, Gurma ka firmosur një tender me vlerë 70 milionë lekë. Dhe përse harxhohet ky fond? Bëhet fjalë për prokurimin me objekt “Rikonstruksion të sallës së mbledhjeve në Bashki”. Në këto vite Bashkia Sarandë nuk i është nënshtruar ndonjë rikonstruksioni, ndërsa këto salla pothuajse nuk janë vënë në funksion fare. Por, tashmë që po afrojnë zgjedhjet duhen salla për të zhvilluar një pjesë të fushatës elektorale dhe për të mbledhur qytetarët, që t’iu kërkohet sërish vota. Sipas të dhënave të dokumentit, punimet për riparimin e sallës do të zgjasin 40 ditë. Për kaq punë, kompania fituese do të xhirojë 7. 083. 333 të reja.
Në kontratë evidentohet se fituese është kompania “ASI-2A CO”, por në fakt nuk janë paraqitur pikët që ajo ka marrë nga vlerësimi i komisionit, me të cilat u shpall e para. Nuk e dimë nëse ky komision kontrollon cilësinë me të cilën punojnë kompanitë. Ndërkohë, firma në fjalë është denoncuar disa herë në media se nuk mbyll punimet e kontraktuara në tenderë publikë.
Projektet abuzive
Një rast abuzimi është ndërtimi i urës në fshatin Suk, në Bashkinë Roskovec. Ky objekt u ndërtua në vitin 2020 nga kompania “ASI-2A CO”, por u shemb gjashtë muaj pasi u përfundua. Si pasojë, rreth 300 fermerë mbetën pa rrugë për të shkuar në tokat e tyre. Sipas banorëve, ura ende nuk është inauguruar, ndërkohë që rezulton se bashkisë i ka kushtuar miliona lekë fonde shtesë. Autoritetet vendore deklarojnë se ende nuk është bërë pagesa dhe do t’i kërkohet kompanisë kontraktuese të marrë masa për riparimin e duhur.
Pas këtyre denoncimeve urës iu bë vetëm një riparim shkel e shko, por sërish nuk është në standardet e duhura. Ndërkohë, me sa duket edhe Bashkia Sarandë po ndjek të njëjtin shembull të keq. Janë 70 milionë lekë të mbledhura nga taksapaguesit e Sarandës që i besohen mikut të kryebashkiakut, që ky të zhvillojë fushatë komode.
Kjo është vetëm një nga lëvizjet që po bën Gurma në prag zgjedhjesh. Pak ditë më parë, Gijotina.com denoncoi se si Adrian Gurma shpenzoi 10 000 000,00 lekë të reja për rikonstruksionin e një lulishteje. Ky ishte një tender i zhvilluar në shkelje të ligjit. Me sa duket ethet e garës po vënë nën “presion” kryebashkiakët në vend, që të përvetësojnë dhe shpërdorojnë sa më shumë!
Lexo edhe: Lulishte zgjedhore/ Adrian Gurma i fal 100 mln lekë Bledar Manes
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post