Skënderbeu i Korçës vijon me fazën përgatitore me ritme të larta pune, teksa ditën e djeshme trajneri Ivan Gvozdenoviç ka parë të udhës që të zhvillojë edhe një analizë me ekipin pas tri miqësoreve ku korçarët nuk kanë arritur rezultate optimale.
“Jemi në mbyllje të fazës përgatitore dhe jam i kënaqur që gjërat kanë shkuar më së miri për ne nga ana fizike. Nuk kemi pasur dëmtime deri më tani dhe kjo tregon se kemi punuar si duhet dhe ju e keni përballuar me sukses ngarkesën e marrë gjatë këtyre javëve. Por dua të ndaj me ju disa fakte që më kanë rezultuar të rëndësishme pas analizimit të videove të ndeshjeve të fundit.
Në dy takimet e fundit nuk kemi qenë efikasë në sulm dhe nuk kemi pasur grintën e duhur veçanërisht në 30 metrat e fundit. Dua të shoh më shumë goditje drejt portës dhe finalizim të saktë të aksioneve dhe lojës që prodhojmë. Nga ana tjetër e them me ngulm vazhdimisht se duhet të mos e humbim përqendrimin në fund. Në dy takime jemi ndëshkuar në fund dhe kjo është e patolerueshme.
Loja përfundon kur bie bilbili dhe jo kur duam ne. Para se të ankohemi për ndërhyrje të ashpra në fushë të përqendrohemi te loja dhe të jemi të vëmendshëm deri në momentet e fundit të takimit. Unë jam i bindur se gjithçka do të shkojë mirë, pasi cilësia tuaj dhe angazhimi nuk ka munguar”, mendohet të ketë thënë veç të tjerash ekipit trajneri Ivan Gvozdenoviç./PanoramaSport
Discussion about this post