Ambasadori i Serbisë në Shtetet e Bashkuara të Amerikës, Marko Gjuriç, ka vijuar replikat me ish- ambasadoren e Kosovës në Shtetet e Bashkuara të Amerikës, Vlora Çitaku, lidhur me problemet politike dhe etnike mes dy vendeve. Në postimin e tij në “Twitter”, Gjuriç ka konsideruar Dua Lipën, këngëtaren shqiptare, si bashkëkombase të tijën.
“Duke lënë komentet urrejtëse anash, jam shumë krenar për bashkëkombësen tonë të dashur Dua Lipa (flamur i Serbisë) edhe pse ajo mund të mendojë ndryshe për çështjet politike”, ka shkruar Gjuriç.
Kjo deklaratë nuk është pritur aspak mirë nga komentuesit të cilët i kanë përmendur deklaratat e këngëtares mbi prejardhjen e saj dhe mbi krimet e luftës në Kosovë.
Këto deklarata vijnë pas përplasjes mes dy zyrtarëve, pasi tenisti serb Novak Gjokoviç njoftoi se i është dhënë leja për të garuar në Australian Open, duke bërë një përjashtim mjekësor nga vaksinimi.
“Të gjitha kafshët janë të barabarta, por disa kafshë janë më të barabarta se të tjerët”, ishte postimi i nënkryetares së PDK-së, Vlora Çitaku, që nisi përplasjen me Gjuriçin.
Discussion about this post